Дзе жыў Лукашэнка ў Баку?

Прэс-служба кіраўніка хавае інфармацыю аб тым, дзе ён спыніўся падчас свайго візіту ў Азербайджан.

У пазамінулы раз, вясной 2007 года, Лукашэнка спыніўся, як сцвярджалі мясцовыя СМІ, у рэзідэнцыі прэзідэнта Азербайджана, дзе могуць знаходзіцца толькі госці кіраўніка краіны.

У ходзе той паездкі беларускі кіраўнік адмовіўся ад пражывання ў якім-небудзь з гатэляў Баку. Нават у Excelsior, якому прысвоеная катэгорыя «5+». Хоць, як адзначалася, у нумарах менавіта гэтай гасцініцы неаднаразова гасцявалі першыя асобы Турцыі, Кіпра, Расеі і іншых краін.

Рэзідэнцыя кіраўніка Азербайджана, дзе спыняюцца высокія госці, размешчаная непадалёк ад цэнтра Баку - сталіцы, якую таксама называюць «горад вятроў».

- Мы ведаем, што яна раскошная, але з вуліцы самога будынка не відаць. Справа ў тым, што яго агароджвае плот вышынёй не менш двух метраў, - распавяла ў 2007-м «Салідарнасці» адміністратар гатэля Excelsior.

Дзе Лукашэнка жыў падчас афіцыйнага візіту ў Азербайджан у 2010-м - гісторыя замоўчвае. Інфармацыя пра гэта, традыцыйна, за сямю пячацямі яго прэс-службы. Зрэшты, як і на гэты раз, у 2013-м.

Кіраўнік прэс-службы - Сяргей Пелюшкевіч - суправаджае афіцыйную беларускую дэлегацыю ў Азербайджане. У размове з карэспандэнтам «Салiдарнасцi» ён агучыў, што цяпер знаходзіцца ў Баку, але сказаць, дзе спыніўся Лукашэнка, - не можа.

У сваю чаргу, у гатэлі Excelsior агучылі, што Лукашэнка ў іх жыць не будзе, і параілі звярнуцца ў іншыя гасцініцы. Журналісты, улічваючы запыты і перавагі Лукашэнкі, зазірнулі ў рэйтынг самых фешэнэбельных гатэляў Баку (па апошніх дадзеных tripadvisor.ru). І выявілі ў ім на першым месцы «Чатыры сезона». Але і тут глуха: мэнэджэр гатэля адмовілася нешта казаць пра пастаяльцаў, спаслаўшыся на палітыку кампаніі.

Дарэчы, у сеткавым гатэлі «Чатыры сезона» Лукашэнка і яго світа раней ужо гасцявалі. Праўда, у 2011-м, падчас візіту ў Катар.

З апісання гатэля ў Дохе. Гэта раскошны курорт з дванаццаццю масажнымі пакоямі, з тэрапіяй для скуры і цела. Пляж, з поўным наборам паслуг, і прыстань з яхтамі для водных відаў спорту.