«Камета стагоддзя» набліжаецца да Зямлі

Адкрытая беларусам камета ўжо цяпер бачная на зорным небе.

ISON (C/2012 S1) называюць самай яркай каметай стагоддзя. Калі яна не выбухне на падыходзе да Сонца, то назіраць яе на ўзыходзе над гарызонтам у яснае надвор'е можна будзе да канца снежня, паведамляе тэлеканал «Россия 24».

Відовішча абяцае стаць зачаравальным, бо лёд з цела зоркі ўтварае незвычайна яркі хвост, а гэта не можа не ўражваць. Дваццаць восьмага лістапада камета пройдзе ўсяго ў 1 млн км ад нябеснага свяціла і апынецца ў 150 разоў бліжэй да Сонца, чым наша планета. Астраномы сцвярджаюць, што сонечнае прыцягненне прымусіць ISON разагнацца да 380 км у секунду, піша «Утро.ру».

Пры гэтым прамяні нагрэюць шар з лёду, металу і каменя да 2760°С, што зробіць яго ярчэй большасці камет. Некаторыя навукоўцы, дарэчы, спадзяюцца нават на тое, што ISON на небе зможа зацямніць Месяц і нават стаць бачнай у дзённы час. А значыць, камета будзе бачная няўзброеным вокам у ранішнія гадзіны на працягу ўсяго снежня і затым, у студзені, у начны час.

Дарэчы, першыя здымкі каметы з'яўляюцца ў інтэрнэце пачынаючы ўжо з 7 лістапада, пры гэтым большасць выяў зроблена з дапамогай бінокляў або невялікіх тэлескопаў. Прама цяпер яе назіраюць на ўсходзе ранішняга неба. «Я, нарэшце, разглядзеў ISON з дапамогай маленькага бінокля! - напісаў на днях пілот Браян Уітакер. - Пакуль яна выглядае слабой, але, па прагнозах, з кожным днём будзе станавіцца ярчэй. Упэўнены, гэта будзе ўражліва!»

Мяркуецца, што гэтая камета з'явілася ў часы фармавання Сонечнай сістэмы, 4,5 млрд гадоў таму. ISON ніколі не наведвала ўнутраную частку нашай планетнай сістэмы да таго, як узнікла з воблака Аорта, рэзервуара ледзяных целаў за межамі арбіты Нептуна. Да ISON самай вядомай сярод гэтых зорак была камета Галея, якую ў апошні раз назіралі ў 1986 годзе.

Што да каметы ISON, то яна была адкрытая 21 верасня 2012 г. беларускім астраномам-аматарам Віталём Неўскім і Арцёмам Навічонкавым з Петразаводска.