«Коммерсант»: Лукашэнка не атрымаў выкуп за Баўмгертнера

Шантаж беларускага кіраўніка апынуўся беспаспяховым.

Генпракуратура Беларусі задаволіла расейскі запыт аб экстрадыцыі гендырэктара ААТ «Уралкалій» Уладзіслава Баўмгертнера. Паколькі ў Расеі ён быў завочна арыштаваны судом, пры перасячэнні мяжы яго ўзялі пад варту. Крыніцы расейскага выдання «Коммерсант» кажуць, што выкуп у $100 млн за топ-мэнэджэра не плацілі.

Як паведамілі ўчора ў генпракуратуры Беларусі, ведамства задаволіла просьбу Генпракуратуры Расеі аб экстрадыцыі Уладзіслава Баўмгертнера, які змяшчаецца пад вартай у Менску з 26 жніўня. Сваё рашэнне ведамства тлумачыць тым, што ў Расеі генеральнаму дырэктару «Уралкалію» СКР завочна прад'явіў абвінавачванне ў здзяйсненні злачынства, прадугледжанага ч. 3 арт. 33 і ч. 2 арт. 201 КК (арганізацыя злоўжывання паўнамоцтвамі), ён быў завочна арыштаваны Басманным райсудом і абвешчаны ў міжнародны вышук.

Як падкрэслілі ў рэспубліканскай генпракуратуры, просьба расейскіх калегаў адпавядала патрабаванням Менскай канвенцыі ад 1993 года, а абвінавачванні, вылучаныя ў Расеі супраць спадара Баўмгертнера, аналагічныя прад'яўленым яму ў Беларусі, таму перашкод для экстрадыцыі топ-мэнэджэра «Уралкалію» «для прыцягнення яго да крымінальнай адказнасці» не маецца. Да таго ж адпаведную пастанову генпракуратуры Беларусі сам абвінавачаны абскарджваць не стаў. Учора ўвечары ў Менску спадар Баўмгертнер быў перададзены супрацоўнікам праваахоўных органаў Расеі, якія ўжо ўначы даставілі яго на самалёце ў Маскву.

Варта адзначыць, што рашэнне аб экстрадыцыі было прынята праз тры дні пасля афіцыйнай аб'явы аб продажы Suleyman Kerimov Foundation усіх акцый «Уралкалію», якія належалі яму, групе АНЭКСІМ Міхаіла Прохарава і саўладальніку кампаніі Дзмітрыю Мазепіну. Апошняга лічаць бізнесменам, блізкім да Лукашэнкі, які з моманту арышту Уладзіслава Баўмгертнера жорстка патрабаваў змены акцыянераў «Уралкалію», лічачы гэты пункт, як і выплату шкоды ў $100 млн, адной з абавязковых умоў вызвалення арыштаванага.

У Маскве спадара Баўмгертнера, які знаходзіўся ў апошні час пад хатнім арыштам, чакае СІЗА. 6 лістапада Масгарсуд, адхіліўшы скаргу абароны гендырэктара «Уралкалію» на яго завочны арышт, у сваім рашэнні адзначыў, што следствам сабрана дастаткова падстаў для абрання гэтай меры стрымання, абвінавачванне заснавана на аб'ектыўных дадзеных, а прад'яўлена «пры наяўнасці дастатковых доказаў», якія пацвярджаюць дачыненне спадара Баўмгертнера да здзяйснення дзеі, якая інкрымінуецца. Падстаў сумнявацца ў прадстаўленых следствам матэрыялах у суда «не мелася». У далейшым следства і суд могуць абраць для яго той жа хатні арышт, вызваленне пад падпіску або заклад.

Прадстаўнікі «Уралкалію» вызваленне Уладзіслава Баўмгертнера каментаваць не сталі. Крыніцы, знаёмыя з сітуацыяй, сцвярджаюць, што ні кампанія, ні дзейсныя акцыянеры не плацілі выкуп за топ-мэнэджэравыкуп за топ-менеджера і не пералічвалі Менску грошы, у якія рэспубліка ацаніла сваю шкоду, - $100 млн. У той жа час адзін з суразмоўцаў кажа, што яна стала «добрай воляй» беларускага кіраўніка пасля заявы аб хуткай змене акцыянера. Іншая крыніца дадае, што дамоўленасці пра гэта былі дасягнутыя раней на «больш высокім некарпаратыўным узроўні». І зараз, калі афіцыйна пацвердзілася інфармацыя пра новага акцыянера, які прыйдзе на змену Сулейману Керымаву, беларускі бок выканаў свае абяцанні.

Уладзіслаў Баўмгертнер быў затрыманы ў Менску 26 жніўня, яму было прад'яўленае абвінавачванне ў злоўжыванні ўладай і службовымі паўнамоцтвамі і прымененая мера стрымання ў выглядзе заключэння пад варту. Праз месяц мера стрымання была замененая на хатні арышт, удакладненае абвінавачванне. У канцы кастрычніка на 2 месяцы падоўжаныя тэрміны расследавання крымінальнай справы ў дачыненні да гендырэктара «Уралкалію», ён пакінуты пад хатнім арыштам.

Пасля таго, як Баўмгертнер быў пераведзены пад хатні арышт, прадстаўнікі амбасады Расеі адзін раз сустракаліся з ім. На той сустрэчы ён не выказаў пажаданняў і скаргаў.

Экстрадыцыі і вызвалення Уладзіслава Баўмгертнера неаднаразова патрабавалі прадстаўнікі ўлады Расейскай Федэрацыі.