Да Вільні можна будзе дабрацца на электрычцы
12- 6.12.2013, 17:44
- 16,603
БЧ і кітайская кампанія CUEC падпісалі дамову па электрыфікацыі напрамку Маладзечна - мяжа з Літвой.
Кошт праекта складзе $90 мільёнаў, піша «Інтэрфакс».
«Літаральна гадзіну таму БЧ падпісала дамову будаўнічага падраду з Кітайскай кампаніяй па экспарту і імпарту электраабсталявання (CUEC)», - паведаміў у пятніцу ў Менску начальнік БЧ Уладзімір Марозаў, адказваючы на пытанне аб выніках конкурсу па выбары падрадчыка па электрыфікацыі ўчастку Маладзечна - Гудагай - мяжа з Літвой.
Ён адзначыў, што ў конкурсе бралі ўдзел пяць кампаній, у тым ліку з Расеі, Германіі, Чэхіі. «Па выніках конкурсу перамагла гэта кампанія (CUEC)», - падкрэсліў начальнік БЧ. Марозаў нагадаў, што дадзеная кампанія з'яўляецца партнёрам па праектах па электрыфікацыі, якія рэалізуюцца ў цяперашні час
«Мы пачынаем рэалізацыю праекта па электрыфікацыі ўчастку Маладзечна - Гудагай - мяжа з Літвой і паралельна пачатыя работы на літоўскім участку (ад дзяржмяжы да Новай Вільні)», - распавёў начальнік БЧ.
Паводле яго інфармацыі, кошт праекта па электрыфікацыі беларускага ўчастка складае каля $90 млн. Марозаў удакладніў, што 85% гэтай сумы складуць крэдытныя рэсурсы, у прыватнасці Эксімбанка Кітая.
Як адзначыў кіраўнік чыгункі, «да канца 2015 года мы адкрыем рух на гэтым участку».
Участак Маладзечна-Гудагай-дзяржмяжа (80 км) з'яўляецца беларускім участкам адгалінавання Агульнаеўрапейскага транспартнага калідора 9В па маршруце Кіеў-Менск-Вільня-Каўнас-Клайпеда.