Кіроўца «Паршэ» прызнаў віну

(абноўлена - 13:30) Калегія Менскага гарадскога суда 29 сакавіка не задаволіла скаргу абароны Андрэя Забабуры на прысуд суда Фрунзенскага раёна Менска.

Пра гэта журналістам паведаміў брат асуджанага Сяргей Забабура. Адвакат асуджанага Валерыя Зезятко мець зносіны з журналістамі адмовілася, піша БелаПАН.

Брат і адвакат Забабуры адмовіліся адказаць на пытанне журналістаў, ці будуць яны аспрэчваць рашэнне Менгарсуда ў вышэйстаячай інстанцыі.

Адвакат пацярпелых Ксенія Кабаса распавяла прадстаўнікам СМІ, што пацярпелыя «не жадаюць, каб пакутавалі чужыя дзеці, а ў Забауры два маленькіх хлопчыка, і цяпер ставяцца да абвінавачанага больш мякка».

Яна нагадала, што ў судзе першай інстанцыі пацярпелыя не настойвалі на цвёрдым прысудзе, аддаўшы рашэнне на водкуп суду.

У касацыйнай скарзе на прысуд суда Фрунзенскага раёна Забаура сваю віну прызнаў, хоць раней адмаўляў яе. Забабура і яго адвакат прасілі Менгарсуд прызначыць яму пакаранне, не звязанае з пазбаўленнем волі. Пацярпелыя супраць гэтага не пярэчылі.

Ксенія Кабаса адзначыла, што калі пацярпелыя вырашаць падаць «наглядную скаргу па матывах жорсткасці судовага рашэння», яна яе складзе.

Што тычыцца заяўленых пазоваў на 450 мільёнаў рублёў, то, як сказала адвакат, калі пацярпелыя іх не адклічуць, то яны будуць разглядацца ў судзе Фрунзенскага раёна.

Нагадаем, 15 лютага кіроўца аўтамабіля «Паршэ Кайен» Андрэй Забабура, які 13 лістапада мінулага года пераехаў трэцякласніка СШ № 23 Уладзіслава Грудзьева прама каля школы, судом Фрунзенскага раёна быў прыгавораны да чатырох гадоў пазбаўлення волі ў калоніі-пасяленні. 38-гадовы дырэктар прыватнай фірмы прызнаны вінаватым па ч. 2 арт. 317 Крымінальнага кодэкса (парушэнне правілаў дарожнага руху, што пацягнула па неасцярожнасці смерць чалавека).

Фота: «Радыё Свабода»