На Кіпры замарожаныя грошы беларускіх чыноўнікаў?

У Bank of Cyprus і Laiki Bank замарожаныя каля $3 млрд., падкантрольных Лукашэнку і яго атачэнню.

Пра гэта на ўмовах ананімнасці паведаміла крыніца ўкраінскага сайта «Версии.com» у Нікасіі. Пакуль немагчыма сказаць, у якой меры названая сума належыць беларускаму дыктатару, а ў якой - яго палітычным і дзелавым партнёрам. Кіруе гэтымі актывамі вядомы бізнэсмэн Дзмітрый Мазепін, чыя ФПГ «Уралхім» і з'яўляецца фармальным уласнікам сродкаў.

Як паведамлялася ў СМІ, ураджэнец Беларусі Мазепін блізкі да Лукашэнкі: за асаблівыя заслугі перад краінай яму было прысвоенае беларускае грамадзянства. Па іншых дадзеных, Дзмітрый Мазепін валодае дыпламатычным пашпартам Рэспублікі Беларусь і нярэдка выконвае асоба далікатныя даручэнні Лукашэнкі за межамі краіны.

У лютым 2013 года шэраг СМІ ў Беларусі, Украіне і Расеі паведаміў аб магчымым прызначэнні Мазепіна віцэ-прэм'ерам РБ, а таксама аб буйным крэдыце Ашчаднага банка РФ, які Менск збіраецца атрымаць пад гарантыі ФПГ «Уралхім». Пры гэтым крэдыт звязваўся з магчымасцю ўдзелу партнёраў «Уралхіма» ў прыватызацыі буйных прадпрыемстваў хімічнага комплексу рэспублікі - «Беларуськалія» і «Гроднаазота». Адміністрацыя Лукашэнкі і ўрад Беларусі не абверглі гэтых паведамленняў, але ні прызначэнне, ні крэдытная здзелка пакуль не адбыліся.

Па звестках той жа крыніцы, зараз робяцца спробы перавесці сродкі беларускай эліты з Кіпра ў Латвію, дзе ў групы «Уралхім» таксама ёсць буйны бізнес. Так, латвійскай кампаніі Uralchem Trading SIA, створанай у 2009 годзе для продажу мінеральных угнаенняў праз рыжскі порт, атрымалася ў сапраўдны момант стаць найбуйнейшай латвійскай кампаніяй па чыстым абароце. Таксама група «Уралхім» (праз прыналежную ёй афшорную кіпрскую кампанію Uralchemfreightlimited) удзельнічае ў будаўніцтве ў Свабодным порце Рыга новага тэрмінала для мінеральных угнаенняў. Паспяховаму прасоўванню «Уралхіма» ў Латвіі ён шмат у чым абавязаны плённаму партнёрству Д. Мазепіна з вядомымі латвійскімі палітыкамі А. Шлесерсам, А. Шкеле і А. Лембергсам, якія маюць мінарытарныя долі ў латвійскіх праектах групы «Уралхім».

Прадстаўнікі афіцыйнага Менска ад каментароў пакуль ухіліліся. Аднак неафіцыйна адзін з дэпутатаў беларускага «парламента» заявіў, што раскрыццё інфармацыі аб рэальным удзеле Лукашэнкі ў кіпрскіх актывах, фармальна падкантрольных «Уралхіму» і яго ўладальніку Мазепіну, можа стаць для беларускага кіраўніка досыць балючым. А для Еўразвяза - дадатковым рычагом ціску на Менск, у тым ліку ў пытаннях выканання правоў чалавека ў Беларусі. Таксама не выключана, што неабходнасць разблакавання $3 млрд. і пераводу іх у іншую краіну (як мяркуецца, Латвію) прымусіць беларускае кіраўніцтва змяніць вектар перамоваў аб прыватызацыі кампаній «Беларуськалій» і «Гроднаазот». Магчымасцю набыцця гэтых прадпрыемстваў раней цікавіліся нямецкія, польскія і некаторыя іншыя інвестары.

Створаная ў 2007 годзе ААТ «АХК «Уралхім» (Аб'яднаная хімічная кампанія «Уралхім») з'яўляецца адной з найбуйнейшых кампаній на рынку мінеральных угнаенняў і пятым па памерах у свеце вытворцам азотных угнаенняў. Кампаніі належаць завод «Азот» у г. Бярэзнікі Пермскай вобласці, завод «Мінеральныя ўгнаенні» у г. Перм, Кірава-чэпецкі завод мінеральных угнаенняў у Кіраўскай вобласці і іншыя прадпрыемствы. Дзмітрыю Мазепіну, які займаў у свой час пасаду намесніка старшыні РФФІ, належыць 95,5% акцый «Уралхіма», астатнія акцыі - у менеджменту кампаніі.