Сідорскі паскардзіўся на Мытны саюз

Еўразійская эканамічная камісія заявіла пра перашкоды гандлю сельскагаспадарчымі таварамі і асобнымі відамі рэсурсаў.

Пра гэта было сказана на трэцім пасяджэнні Кансультатыўнага камітэта па аграпрамысловаму комплексу, якое адбылося ў Маскве пад старшынствам міністра па прамысловасці і аграпрамысловаму комплексу ЕЭК Сяргея Сідорскага, паведамляе БелТА.

Перашкоды ў гандлі выяўленыя Дэпартаментам аграпрамысловай палітыкі ЕЭК на аснове аналізу заканадаўства, таксама інфармацыі галіновых арганізацый і дзелавых колаў дзяржаў - членаў МС і АЭП. З 25 бар'ераў па 3 тычацца прадукцыі жывёлагадоўлі і раслінаводства, 8 - харчовай прадукцыі, 11 - алкагольнай прадукцыі.

Сяргей Сідорскі праінфармаваў, што аналагічная інфармацыя збіраецца і абагульняецца іншымі падраздзяленнямі камісіі, таму неабходна паставіць яе на сістэмную аснову. Аднак пры гэтым нельга выпускаць галіновыя аспекты абмежаванняў.

«Асноўныя бар'еры ляжаць у плоскасці гандлёвых абмежаванняў, ім звычайна надаюць найбольшую ўвагу, - сказаў Сяргей Сідорскі. - На другім плане застаюцца пытанні тэхнічнага рэгулявання. Аднак, як паказвае аналіз зваротаў у камісію суб'ектаў гаспадарання, праблемы ссоўваюцца ў гэтую сферу. Нельга выпускаць і іншыя аспекты, звязаныя з адміністрацыйнай практыкай. Важна таксама разумець, якія бар'еры паўсталі з прычыны невыканання рашэнняў, прынятых наднацыянальнымі органамі, па якіх нарматыўная база Мытнага саюза пакуль не створаная, якія перашкоды могуць быць ліквідаваныя нацыянальнымі ўрадамі. У гэтай працы неабходна аб'яднаць намаганні дэпартаментаў камісіі, нацыянальных органаў дзяржаўнага кіравання, бізнес-супольнасці. У бліжэйшы час мы ініцыюем рашэнні ў гэтай галіне».

Нагадаем, правілы МС раней былі раскрытыкаваныя беларускім МУС, прадстаўнік якога заявіў пра пагрозу росту наркатрафіку праз Беларусь.