Барыс Жэліба: Снапкоў павязе ў В'етнам ровары

Беларускае кіраўніцтва ўсімі спосабамі імкнецца павялічыць экспарт і дзейнічае паводле прынцыпу «зерне да зерня, будзе поўная мерня».

Такім чынам эканаміст Барыс Жэліба пракаментаваў сайту charter97.org візіт беларускай дэлегацыі ў В'етнам і Лаос.

«Ад Лаоса нам мала карысці, таму што гэта маленькая і слабаразвітая краіна. Я не ведаю, што мы можам там сур'ёзнае прадаць, і што можам атрымаць. В'етнам, вядома, дзяржава буйнейшая, і там больш ёмісты рынак. Мы хочам і можам прадаць кожнай краіне тое ж самае, што і Інданэзіі. В'етнам, напрыклад, можа купіць трактары, МАЗы і калійныя ўгнаенні, гэта тыповыя артыкулы беларускага экспарту. Гэта небагатая краіна, але тое-сёе купіць здольная», - адзначыў эканаміст.

Ён мяркуе, што кіраўніцтва нашай краіны ўсяляк імкнецца павялічыць экспарт паводле прынцыпу «зерне да зерня, будзе поўная мерня».

«Я памятаю, што яшчэ з савецкіх часоў у В'етнам прадавалі ровары. А ў нас, як вы ведаеце, завод «Мотавела» знаходзіцца не ў вельмі добрым стане, і было б нядрэнна, калі б прадукцыю гэтага прадпрыемства прадавалі туды. Ровар - гэта самы модны транспарт у В'етнаме, але давядзецца канкураваць з Кітаем, які выцесніў ўсіх на гэтым рынку.

Што можна атрымаць ад гэтых далёкіх трапічных краін? Безумоўна, рыс, асноўную сельскагаспадарчую культуру. Не варта забываць аб добрым в'етнамскім бальзаме «зорачка». Статус ў гэтых краінаў, вядома ж ніжэйшы, чым у Сінгапура і Інданэзіі. Адпаведна, статус чыноўнікаў, які іх наведвае, ніжэйшы», - падсумаваў навуковец.

Нагадаем, беларуская дэлегацыя на чале з міністрам эканомікі Мікалаем Снапковым наведае В'етнам і Лаос з 3 да 9 красавіка.

Дадамо, што напрыканцы сакавіка з замежнай паездкі вярнуўся беларускі правадыр Аляксандр Лукашэнка. Ён адсутнічаў у краіне амаль два тыдні і наведаў з рабочым візітам ААЭ, Сінгапур і Інданэзію.