«Халодны мір» стаў яшчэ халадней
24- 16.05.2013, 11:01
Арышт меркаванага супрацоўніка ЦРУ ў Маскве паходзіць на анекдот.
Але ў рэальнасці дэманструе, наколькі абвастрыліся амерыкана-расейскія адносіны, мяркуе на старонках Foreign Policy журналістка Ганна Нямцова.
Расейскія інтэрнэт-карыстальнікі цешацца са шпіёнскага скандалу. Афіцыйная Масква, наадварот, абураецца. «Як мог нейкі амэрыканскі шпіён швэндацца па горадзе ў парыку, калі дырэктар ФБР едзе ў Маскву абмяркоўваць з ФСБ бостанскія тэракты?» - апісвае аўтар гэтую рэакцыю.
Дарадца Пуціна Юрый Ушакоў сказаў пра ўмацаванне супрацоўніцтва Расеі і ЗША: «Відавочна, што гэтыя сігналы, імпульсы зверху да выканаўчага ўзроўню амерыканскага боку не былі даведзеныя».
Нямцова каментуе: «У сённяшнім крамлёўскім лексіконе «імпульсы» - важнае слова. Кожны чыноўнік у любым кутку шырокай Расеі ўважліва сочыць за знакамі і сігналамі, якія разбягаюцца з засяроджання ўлады ў Маскве, і старанна калібруе сваю рэакцыю ў адказ».
Але што ж адбываецца на выканаўчым узроўні расейскага боку? - пытаецца Нямцова. Пуцін выказвае жаданне ўмацаваць супрацоўніцтва спецслужбаў. Але «паток антыамерыканскай рыторыкі не спадае», кажа маскоўскі эксперт Ігар Бунін.
Учора па тэлевізары паказалі дзве перадачы: пра арышт Фогла і пра тое, як «Вашынгтон фінансуе рэвалюцыю на вуліцах Расеі» (фармулёўка аўтара). Ідэя другой перадачы - у тым, што ЗША, зусім як Фогл, спрабуюць наймаць за грошы расейцаў, гатовых абслугоўваць інтарэсы ЗША.
Бунін падкрэсліў: «Пуцін мог бы адной пстрычкай пальца спыніць гэтую гучную антыамэрыканскую кампанію, але штука ў тым, што ён наогул сам яе ўхваляе».
Гэтыя трэнні ў бліжэйшы час не знікнуць, прагназуе Нямцова, нагадаўшы пра ўзмацненне націску на НКА.
Пераклад: Inopressa.ru