Эпідэмія афрыканскай чумы свіней пад Баранавічамі

Сталі вядомыя шакавальныя падрабязнасці надзвычайнага здарэння на буйным свінакомплексе «Усходні».

Некалькі работнікаў комплексу, якія працуюць непасрэдна на 9-м участку прадпрыемства, дзе захварэлі свинаматкі, распавялі аб развіцці падзей апошняга месяца і рабскіх умовах працы, у якіх ім даводзіцца працаваць, піша «Салiдарнасць».

Гэтыя звесткі кардынальна адрозніваюцца ад афіцыйных каментароў кіраўніцтва свінакомплекса і чыноўнікаў. Некалькімі днямі раней начальнік свінакомплексу «Усходні» заявіў, што «масавае знішчэнне жывёл і аповеды сведкаў аб тым, як «у траншэі парасят жыўцом кідалі» - не больш, чым выдумка».

«На працягу месяца штотыдзень памірала некалькі галоў, - распавёў адзін з пастаянных работнікаў 9-га ўчастка свінакомплексу, які пажадаў застацца неназваным. - 27 красавіка ДАІ ачапіла комплекс у радыусе прыкладна 3 км (аўтамабілі старонніх не прапускалі), прыехалі МНСнікі, міліцыя, вайскоўцы на машынах з антэнамі (а пазней і менскія эпідэміёлагі)».

Аўтамабілі работнікаў праходзілі праз блокпасты і спыняліся прыкладна ў кіламетры ад свінакомплексу, далей даводзілася і даводзіцца ісці пешшу. Таксама на КПП у рабочых канфіскоўваліся мабільныя тэлефоны. Нам агучылі, што ў любым выпадку ўсталяваныя глушылкі, размовы праслухоўваюцца. Інфармацыю аб тым, што адбываецца на свінакомплексе, распаўсюджваць забаранілі.

Кіраўніцтва комплексу не хавае, што ідзе барацьба з афрыканскай чумой свіней.

Быў паражаны 9-ы ўчастак, дзе ўтрымліваліся свінаматкі. У тую суботу ўсю ноч рылі катлаваны, а на працягу некалькіх дзён было забіта і закапана каля 20 тысяч галоў. Свіней у асноўным рэзалі і закідвалі ў ямы, перасыпаючы хлоркай.

Па словах суразмоўцы, для знішчэння жывёлы прыцягнулі ўсіх забойшчыкаў, выклікалі нават тых, хто на момант надзвычайнага здарэння знаходзіўся ў адпачынку.

«Таксама ў той дзень былі адкліканыя ўсе грузавікі, якія развозілі па краіне прадукцыю КПС «Усходні» - усю яе знішчылі. Але ўсё роўна цяпер халадзільнікі пад завязку запоўненыя, і пакуль невядома, што з ёй будуць рабіць.

Тыдзень знішчалі свіней, пры гэтым пра эпідэмію (ці як бы гэта не называлі афіцыйна) ні слова не было сказана ў СМІ. Толькі потым, калі палова пасёлка Жамчужны (многія жыхары працуюць на свінакомплексе) пачала біць у званы і звяртацца ў СМІ, інфармацыя атрымала рэзананс.

На працягу амаль паўтары тыдняў у нас ненармаваны працоўны дзень, працуем без выхадных. Многія прыходзяць у 8 раніцы, а сыходзяць апоўначы. Некаторых не адпускаюць і прыходзіцца працаваць і ноччу. Рабочым забараняюць перасоўвацца па комплексе пешшу - толькі на аўтобусах. Пасля змены неабходна цалкам памыцца. «Ссабойку» прыносіць таксама забаронена - есць дазволена толькі ў сталовай.

Многія баяцца за сваё здароўе (акрамя таго, што пад вялікім пытаннем аплата за перапрацоўку), і звальняюцца. Але кантракты з імі не скасоўваюць. Мы ведаем, што прэм'ер-міністр Міхаіл Мясніковіч дэталёва азнаёмлены з сітуацыяй. Нам агучылі, што ён распарадзіўся ўсё ж даць людзям выходны на Вялікдзень, а потым зноў вырашаць праблему. У пятніцу кіраўніцтва склікала рабочых на сход, сказала, што сітуацыя пагоршылася і наступствы спыніць пакуль не могуць, так што працы пакуль не ўбавіцца», - распавядае працаўнік свінакомплекса.

Тое, што сітуацыя крызісная, пацвярджае і тое, што комплекс па-ранейшаму пад аховай міліцыі, а работнікі працягваюць рыць траншэі.

Па словах жыхароў вёскі Сеўрукі, якая знаходзіцца недалёка ад свінакомплексу, паралельна адбываецца забой свіней у радыусе 10 км ад прадпрыемства - у прыватных угоддзях. Многія ўласнікі самі колюць парасят да з'яўлення візіцёраў. Некаторыя вывозяць і хаваюць іх на хутарах.

Тым часам у Баранавічах назіраецца дэфіцыт свініны, а жыхары горада абураюцца дзеяннямі ўладаў.

«Калі гэта эпідэмія афрыканскай свіной чумы, то чаму пра гэта афіцыйныя асобы не кажуць у СМІ? Чаму не распавядаюць, як гатаваць свініну, каб засцерагчы сябе, бо чалавек з'яўляецца пераносчыкам гэтай хваробы. Ці спальвалі забітых свіней КПС «Усходні»? Таму што калі пагалоўе заражанае афрыканскай чумой і проста закапанае, то ёсць небяспека яе распаўсюджвання, яна можа разносіцца па сцёкавых водах. Гэта тым больш шакіруе, бо побач знаходзіцца птушкафабрыка «Дружба», і нават калі птушцы гэтая хвароба не перадаецца, няхай нам дадуць дакладны і выразны адказ на гэта», - пракаментаваў сітуацыю адзін з лекараў горада Баранавічы.

Нагадаем, 2 траўня сітуацыю пракаментаваў начальнік КПС «Усходні» Георгій Хомчанка. Паводле яго слоў, адсотак падзежа за апошні месяц склаў 6,2%, у той час як па нормах гэты паказчык не павінен перавышаць 15%.

«Падзеж свіней на падобным прадпрыемстве, калі ён у межах нормы, - зусім шэраговая з'ява. Свінні хварэюць амаль кожны месяц - для буйнога прадпрыемства, магутнасць якога больш за 80 тысяч галоў, гэта нармальна. Не разумею, чаму з гэтага раздулі такі скандал? Нехта, напэўна, убачыў, як закопваюць свінню і спалохаўся», - распавёў Георгій Хомчанка. Паводле яго слоў, «забіта было ўсяго 5-7 свіней, выключна каб узяць матэрыял для лабараторнага даследавання.

Хворым свінням паставілі афіцыйны дыягназ - у іх быў выяўлены рэспіраторна-рэпрадуктыўны сіндром свіней. Лабараторныя даследаванні праводзіліся як у беларускіх, так і расейскіх лабараторыях. Як сцвярджаюць абласныя і раённыя ветурачы, захворванне гэта не лічыцца небяспечным.

Як паведамляў charter97.org, на свінакомплексе «Усходні», які належыць Баранавіцкаму камбінату хлебапрадуктаў, зафіксаваны вялікі падзеж жывёлы. Мясцовае кіраўніцтва катэгарычна абвяргала любую інфармацыю аб НЗ, але пры гэтым раён свінакомплексу быў ачэплены міліцыяй, а мясцовыя жыхары пацвярджалі, што ажыццяўляецца масавае пахаванне жывёл.

Самай распаўсюджанай версіяй таго, што адбываецца, была эпідэмія афрыканскай чумы свіней, якая фіксуецца ў суседніх краінах. Зразумець страх мясцовых чыноўнікаў можна - наяўнасць эпідэміі можа прывесці да забароны паставак беларускага мяса ў Расею. Гаворка ідзе пра значныя аб'ёмы - у 2013 годзе Беларусь плануе экспартаваць у Расею 310 тыс. тон мяса і мясапрадуктаў.

Афрыканская чума свіней - высокакантагіёзная вірусная хвароба свіней, якая характарызуецца ліхаманкай, цыянозам скуры і шырокімі гемарагіямі ва ўнутраных органах. Належыць да спісу A згодна з Міжнароднай класіфікацыяй заразных хвароб жывёл. Для чалавека афрыканская чума свіней, у адрозненне ад чумы рускіх свіней - небяспекі не ўяўляе.