Лукашэнка зачакаўся кітайцаў

Па вяртанні з Пекіна кіраўнік запатрабаваў паскорыць будаўніцтва кітайскага парку пад Менскам.

Лукашэнка агучыў гэта даручэнне падчас сустрэчы з прэм'ер-міністрам Беларусі Міхаілам Мясніковічам у пятніцу ў Менску.

Кіраўнік больш падрабязна спыніўся на пытаннях фармавання Кітайска-беларускага індустрыяльнага парку, запатрабаваў зрабіць больш жорсткім кантроль за яго развіццём, а таксама паскорыць усе працы.

«Лукашэнку даложана пра тое, што ўжо ў бягучым годзе плануецца завяршыць праектаванне асноўных інжынерных камунікацый, у прыватнасці газа-і электразабеспячэння першай паўночнай пляцоўкі пад забудову новымі прадпрыемствамі», - паведамілі ў прэс-службе беларускага кіраўніка.

Кіраўнік і прэм'ер-міністр таксама абмеркавалі супрацоўніцтва з Кітаем, і падвялі вынікі мінулага афіцыйнага візіту ў гэтую краіну.

«Лукашэнка ўказаў ураду на неабходнасць дэталёвай прапрацоўкі ўсіх дасягнутых з кітайскім бокам дамоўленасцей, асабліва ў кантэксце маючай адбыцца сустрэчы прэм'ер-міністраў Беларусі і Кітая. На думку кіраўніка беларускай дзяржавы, гэтая сустрэча дасць магчымасць зняць усе існуючыя пытанні ў гандлёва-эканамічнай і фінансавай сферах», - паведамілі ў прэс-службе.

Кіраўнік удакладніў, што ў гэтым дакуменце будуць раздзелы, якія закранаюць усе напрамкі супрацоўніцтва: і гандлёвае, і ваенна-тэхнічнае, і палітычнае, і гуманітарнае.

«Адным словам, сапраўдны план дзеянняў. Гэта вельмі важная для нас прапанова кітайскага боку. Гэта вельмі сур'ёзны новы крок з боку Кітайскай Народнай Рэспублікі ў падтрымцы Беларусі», - адзначыў ён.

Нагадаем, некалькі месяцаў назад крыніцы ва ўрадзе Беларусі пацвердзілі інфармацыю пра тое, што наша краіна выдасць 650 тысяч працоўных віз грамадзянам Кітая.

У невялікае мястэчка Смалявічы каля беларускай сталіцы пераселіцца цэлы кітайскі правінцыйны горад. Калі гэта адбудзецца, то па статыстыцы 1 кітаец будзе прыходзіцца амаль на 14 жыхароў Беларусі. Афіцыйна МЗС Беларусі гэта адмаўляе.