Пуцін даў ордэн Філарэту, а Кірыл - Тозіку
58- 31.07.2013, 16:26
- 21,114
Мітрапаліту Менскаму і Слуцкаму, Патрыяршаму экзарху ўсяе Беларусі Філарэту ад імя прэзідэнта Расеі ўручаны ордэн Аляксандра Неўскага.
Пра гэта паведамляе афіцыйны сайт Беларускай праваслаўнай царквы.
Ордэн быў уручаны падчас «святочнай трапезы», якая адбылася ў гонар гадавіны хрышчэння Кіеўскай Русі. У ёй прынялі ўдзел прадстаяцелі і прадстаўнікі памесных Праваслаўных Цэркваў, іерархі Рускай праваслаўнай царквы з розных краін, прадстаўнікі дзяржаўнай улады, грамадскія дзеячы.
«На ўрачыстай трапезе таксама выступіў надзвычайны і паўнамоцны Амбасадар Расейскай Федэрацыі ў Рэспубліцы Беларусь Аляксандр Сурыкаў. Ад імя прэзідэнта Расеі ён уручыў Мітрапаліту Менскаму і Слуцкаму Філарэту дзяржаўную ўзнагароду - ордэн Аляксандра Неўскага», - гаворыцца ў паведамленні.
Падчас трапезы ўзнагароды атрымалі і беларускія чыноўнікі.
«Свяцейшы Патрыярх Кірыл адзначыў царкоўнымі ўзнагародамі шэраг асоб, якія ўнеслі вялікі ўклад у арганізацыю на беларускай зямлі ўрачыстасцяў у гонар 1025-годдзя Хрышчэння Русі. Ордэн святога роўнаапостальнага князя Уладзіміра III ступені быў уручаны намесніку прэм'ер-міністра Рэспублікі Беларусь Анатолю Тозіку і ўпаўнаважанаму па справах рэлігій і нацыянальнасцяў краіны Леаніду Гуляку. Ордэна Славы і Гонару III ступені былі ганараваныя старшыня Менскага абласнога выканаўчага камітэта Барыс Батура і старшыня Менскага гарадскога выканаўчага камітэта Мікалай Ладуцька», - гаворыцца ў паведамленні прэс-службы БПЦ.