Замежнікі аб сістэме BelToll: Гэта проста жах

Грамадзянка Польшчы была шакаваная складанасцю новай сістэмы аплаты дарог у Беларусі.

Пра тое, якія нязручнасці з'явіліся ў сувязі з увядзеннем сістэмы BelToll, яна распавяла сайту charter97.org.

«Я уязджала з Польшчы ў Беларусь 18 ліпеня, гэта значыць практычна за два тыдні да ўвядзення платных дарог. На мяжы не было ніякай інфармацыі, пры тым, што замежнікі рэгіструюць транспарт, на якім уязджаюць, на тры месяцы, незалежна ад тэрміну знаходжання. Такім чынам, за тры месяцы да 1 жніўня павінна была быць інфармацыя для замежнікаў.

Яшчэ ў ліпені я заўважыла, што на трасе Берасце-Менск з'явіўся знак «платная дарога», нягледзячы на тое, што з замежнікаў заўсёды збіралі грошы на кожным тэрмінале. Калі я пачула, што ў Беларусі з 1 жніўня будуць дадавацца і іншыя платныя дарогі, у мяне з’явілася асацыяцыя, што дзесьці яшчэ будуць усталяваныя пункты збору грошай са шлагбаўмамі. Але я ездзіла ў Аксакаўшчыну, якая знаходзіцца ў 25 кіламетрах ад Менска па гродзенскай трасе, а таксама ў Бараўляны па віцебскай шашы. На гэтых дарогах паставілі аналагічны знак», - зазначыла жанчына.

Яна падкрэсліла, што шмат ездзіць па Еўропе і ведае, што вельмі часта дарогі ў прыгарадах вялікіх гарадоў з'яўляюцца бясплатнымі.

«Таму я думала, што проста еду па бясплатным адрэзку і ня даязджаю да нейкага шлагбаўма. Я ведаю рускую мову і слухала беларускае радыё і глядзела тэлебачанне, а шматлікія замежнікі не ведаюць мовы. Потым я выпадкова даведалася пра бартавыя прылады для замежнікаў, якія, у адрозненне ад Захаду, не купляюцца на кожнай запраўцы, а ў 40 пунктах па ўсёй Беларусі. Але ў Менску такі пункт быў усяго адзін, а кругласутачныя - у Сокале і Самахвалавічах пад Менскам. Пры гэтым ехаць трэба на чужой машыне, таму што дарога туды платная. Акрамя гэтага, мне сказалі, што чарга там 400 чалавек, а ў Менску - 800», - працягнула грамадзянка Польшчы.

Яна дадала, што пад дамовай паставіла 12 подпісаў.

«Усё гэта забірае шмат часу і проста жахліва. Людзі ў чарзе лаяліся матам, штурхаліся і ледзь не біліся. Я спытала ў супрацоўніцы, што рабіць, калі я не ведаю рускай мовы. Яна адказала, што грамадзяніну Чэхіі ўсё тлумачылі на пальцах. Адзначу, што на Захадзе заўсёды ёсць паралельная бясплатная дарога. Адзіны плюс «алімпійкі» у тым, што па ёй можна ехаць 120 км/г, але па гомельскай трасе вельмі часта абмежаванні 70 км/ч. І за што плаціць? Дарэчы, за бартавую прыладу трэба аддаваць заклад у 20 еўра ў беларускіх рублях, якія вяртаюцца пры выездзе з краіны, а замежніку трэба бегаць і мяняць гэтыя грошы. Такім чынам, прайшоўшы ўсе кругі гэтага пекла, замежніку ехаць у Беларусь не захочацца надоўга», - склала жанчына.

Нагадаем, сістэма BelToll пачала паўнавартасна функцыянаваць з 1 жніўня 2013 года: за праезд па асобных дарогах спаганяецца плата ў аўтаматычным рэжыме, пры выяўленні парушальнікаў будуць выпісвацца штрафы. Да 9.00 чацвярга сістэма абслужыла 22 тыс. 740 карыстальнікаў, у якасці платы за карыстанне дарогамі было сабрана каля Br590 млн. За гэты ж час выяўлена каля 340 парушальнікаў, якія праігнаравалі ўвядзенне сістэмы.

На першым этапе сістэмай ахоплена 815 км рэспубліканскіх аўтадарог, у тым ліку траса M1/E30 (Берасце - Менск - мяжа Расейскай Федэрацыі) і дарога на Нацыянальны аэрапорт Менск. Інвестарам праекта выступае аўстрыйская кампанія Kapsch TrafficCom, якая накіруе на яго рэалізацыю 267 млн еўра, у тым ліку ўжо інвеставана 120 млн еўра.