Жыхара Баранавічаў пасадзілі за крадзеж чатырох бюстгальтараў

Прысуд уступіў у законную сілу 3 верасня.

У чэрвені 29-гадовы гараджанін зайшоў у краму жаночай бялізны, схапіў некалькі бюстгальтараў і ўцёк. Далёка сысці мужчыне не ўдалося - яго затрымалі супрацоўнікі Баранавіцкага аддзела Дэпартамента аховы, піша intex-press.by.

Выкрадальнік, як апынулася, раней быў неаднаразова судзімы за крадзеж, рабаванне і хуліганства. У момант здзяйснення злачынства жыхар Баранавічаў знаходзіўся ў стане наркатычнага ап'янення.

Суд Баранавіцкага раёна і горада Баранавічы прызнаў гараджаніна вінаватым у замаху на рабаванне і прысудзіў яго да двух гадоў пазбаўлення волі з адбываннем пакарання ў папраўчай калоніі ва ўмовах строгага рэжыму, а таксама да прымусовага лячэння ад алкагалізму і наркаманіі.

Абвінавачаны палічыў пакаранне занадта суровым і падаў касацыйную скаргу, аднак судовая калегія Брэсцкага абласнога суда пакінула прысуд без зменаў.