Мінгандлю не заўважыў гандлёвай вайны з Расеяй
5- 5.09.2013, 15:54
- 9,510
Намеснік міністра гандлю лічыць, што Беларусь і Расея проста абараняюць свае рынкі.
Пра гэта Ірына Наркевіч заявіла сёння журналістам, перадае БелТА.
Пры гэтым намеснік міністра адзначыла, што не бачыць сёння ніякіх гандлёвых войнаў паміж краінамі. «Мы знаходзімся ў інтэграцыйных працэсах, будзем іх падтрымліваць і развіваць, але на нашым рынку прадуктаў харчавання мы павінны быць вельмі ўважлівымі і адказнымі», - канстатавала намеснік міністра.
Паводле яе слоў, у апошні час у Беларусі кантролю якасці прадукцыі, якая рэалізуецца, надаецца асаблівая ўвага. Так, у Мінгандлю створаная Гандлёвая інспекцыя, якая актыўна займаецца гэтымі пытаннямі на ўнутраным рынку, у тым ліку харчовым. Гэты орган правярае ў гандлёвых аб'ектах суправаджальныя дакументы, якасныя пасведчанні, наяўнасць у сетцы пратэрмінаваных тавараў. «Апроч гэтага, быў уключаны вельмі важны механізм - павелічэнне адказнасці ў выглядзе штрафу», - падкрэсліла Ірына Наркевіч. Намеснік міністра мяркуе, што памер штрафу сёння сур'ёзны: ён павышаны і складае ад 50 да 500 базавых велічынь (цяпер адна базавая роўная Br100 тыс.) і будзе накладацца на юрыдычную асобу.
«Можна колькі заўгодна дырэктыў выдаваць, але патрэбны выразны, сістэмны, усёабдымны кантроль», - упэўненая намеснік міністра. Яна дадала, што трэба кантраляваць не толькі вытворцу на стадыі вырабу прадукту, але і ўсю далейшую дзейнасць, арыентаваную на спажыўца, у тым ліку аптовае і рознічнае звёны ланцужка. «Гэты момант важна не выпусціць. Усе ўдзельнікі гэтага ланцуга павінны выконваць заканадаўства: для ўзмацнення механізмаў кантролю і створаная Гандлёвая інспекцыя», - рэзюмавала намеснік кіраўніка ведамства.
Наконт выказаных заяваў з расейскага боку аб небяспечнасці малочных і мясных прадуктаў, Ірына Наркевіч запэўніла, што грамадзяне могуць бязбоязна іх ужываць. У Беларусі вокамгненна працуе сістэма авяшчэння аб небяспечных прадуктах. Калі такія партыі выяўляюцца, то яны знімаюцца з гандлю.
Ірына Наркевіч паведаміла, што ў цяперашні час узмоцнены ўваходны кантроль на рынках, асабліва па групе мяса-малако-цукеркі. На яе думку, у краінах Мытнага саюза трэба распрацаваць адзіную методыку даследавання прадукцыі, а не толькі гарманізаваць тэхнічныя рэгламенты.
«Я мела зносіны з экспертамі, яны не ўсе разумеюць, як Расея гэтыя даследаванні (цукерак) зрабіла, але цяпер у нас усё старанна правяраюць», - заўважыла намеснік міністра.