Масквіч спрабаваў правезці праз Беларусь 42 кг марыхуаны

У аўтадарожным пункце пропуску «Брэст» жыхар Масквы ноччу 8 верасня спрабаваў правезці праз мяжу блізу 42 кг марыхуаны.

Пра гэта паведаміла БелТА афіцэр прэс-службы Брэсцкай пагранічнай групы Кацярына Паўлава.

Грамадзянін Расеі вяртаўся з Польшчы на радзіму на аўтамабілі «Сааб». Пры перасячэнні дзяржаўнай мяжы выбраў «зялёны калідор», тым самым заявіўшы, што не мае тавараў, якія падлягаюць мытнаму дэклараванню. Аднак пагранічны нарад звярнуў увагу на нервовае паводзіны 36- гадовага вадзіцеля і той факт, што з замежнай паездкі ён вяртаўся без багажу. Супрацоўнікі памежнай службы прынялі пастанову даглядзець аўтамабіль разам з калегамі з Брэсцкай мытні.

Падчас паглыбленага надгляду паміж задняй сценкай пасажырскага сядзення і багажнікам было выяўлена 79 пакетаў з рэчывам расліннага паходжання прыкладна па 350 г кожны. Для далейшага абследавання транспартнага сродку ў бокс запрасілі кінолага - памежніка з сабакам, які праз некаторы час спрацаваў на наркотыкі. У ходзе далейшых пошукаў была знойдзена абсталяваная пад запасным колам аўтамабіля схованка, доступ да якой ажыццяўляўся з боку дна і бампера. У тайніку памерам 1,2 м х 1,2 м і вышынёй у 12 см было выяўлена яшчэ 39 аналагічных пакетаў. Усе скруткі мелі шматслаёвую вакуумную ўпакоўку і былі перасыпаныя каваю.

У агульнай складанасці памежнікі і мытнікі вынялі з аўтамабіля 118 пакетаў з рэчывам расліннага паходжання, як мяркуецца марыхуанай. Агульная вага кантрабанды склала блізу 42 кг. Рэчыва перададзенае для правядзення экспертызы ў экспертна-крыміналістычную лабараторыю УУС Брэсцкага аблвыканкама. Аўтамабіль і кіроўца затрыманыя для далейшага разгляду. Па дадзеным факце Брэсцкай мытняй праводзіцца праверка.