Экс-кіраўнік МЗС Чэхіі: Калі Украіне не дапамагчы зброяй, Пуцін зжарэ яе часткамі
9- 1.10.2014, 11:41
- 7,662
Карэл Шварцэнбэрг заклікаў Еўропу даць Украіне зброю.
Такое меркаванне выказаў былы міністр замежных спраў Чэхіі Карэл Шварцэнбэрг (узначальваў МЗС Чэхіі ў 2007-2009 гадах і ў 2010-2013 гадах) у інтэрв'ю нямецкай газеце Rheinische Post, паведамляе Deutsche Welle.
Ён заклікаў краіны Захаду даць Украіне зброю, каб дапамагчы ў барацьбе з баевікамі.
«Мы таксама павінны дапамагчы Украіне зброяй. Інакш ў краіны няма ні адзінага шанцу ў барацьбе супраць лепш узброеных і падрыхтаваных расейскіх войскаў, і Уладзімір Пуцін зжарэ Украіну па частках», - заявіў былы дыпламат.
У той жа час Карэл Шварцэнбэрг раскрытыкаваў пазіцыю Нямеччыны, у якой многія, на яго думку, заплюшчваюць вочы на рэальнасць сучаснай Расеі. «Шмат хто хацеў бы ўспрымаць тое, што адбываецца як непаразуменне. Яны ўспамінаюць, як Уладзімір Пуцін выступаў у Бундэстагу, кажучы на нямецкай мове, і думаюць пра плённае супрацоўніцтва з Расеяй», - адзначыў Карэл Шварцэнбэрг.
У сувязі з гэтым былы чэшскі міністр дадаў, што гэтыя людзі ўспрымаюць актуальныя падзеі пад лозунгам «не можа быць таго, чаго быць не павінна».