Расея гатовая знізіць здабычу нафты, калі яе кошт абрынецца ніжэй за $90
19- 12.10.2014, 12:45
- 21,767
Падзенне кошту непазбежна прычыніцца да зніжэння даходаў і перагляду бюджэтаў РФ.
Кошт ніжэй за $90 за барэль "не задавальняе буйных вытворцаў нафты". Такое меркаванне выказаў сёння "на палях" міжнароднай энэргетычнай выставы ў Абу-Дабі Power Gen - Middle East 2014 намеснік міністра энэргетыкі РФ Юрый Сянцюрын, піша Лiга.нет.
"Калі кошт будзе зніжацца крытычна, то яны знізяць аб'ёмы здабычы. Гэта непазбежна, хоць і прывядзе да зніжэння даходаў, перагляду бюджэтаў і гэтак далей", - сказаў ён.
На думку Сянцюрына, існыя міжнародныя інстытуты ў галіне энэргетыкі "ўжо не адпавядаюць геапалітычнай ды эканамічнай сітуацыі", піша ПРАЙМ.
"Мы не можам іх выкарыстоўваць у развязанні праблем глабальнага энергетычнага рынку. У сувязі з гэтым наўпроставыя кантакты з нашымі партнёрамі асабліва важныя, бо яны дазваляюць абменьвацца думкамі і прыходзіць да ўзаемавыгадных пастаноў", - мяркуе Сянцюрын.
"Неэфектыўнасць міжнародных арганізацый мы будзем кампенсаваць за кошт больш шчыльнага двухбаковага супрацоўніцтва", - падсумаваў ён.
Нагадаем, кошт нафты на сусветных рынках імкліва падае. Рэзкае і ўстойлівае зніжэнне кошту нафты на сусветных біржах пачалося ў сярэдзіне ліпеня. З тых часоў каціроўкі Brent аселі ўжо на 23%, WTI патаннела на 19%.