Максім Вінярскі: Праз прэвентыўныя арышты актывісты не могуць жыць дома

Значная частка актывістаў сёння фактычна страціла магчымасць пражываць на месцы рэгістрацыі.

Людзі асцерагаюцца адвольных прэвентыўных затрыманняў. Пра гэта заявіў каардынатар грамадзянскай кампаніі «Еўрапейская Беларусь» Максім Вінярскі 15 кастрычніка на прэс-канферэнцыі ў Менску, піша БелаПАН.

«Я, напрыклад, на месцы рэгістрацыі практычна не жыву, бо амаль увесь час перад кожнай вулічнай акцыяй, прыездам нейкага высокага госця з-за мяжы да мяне прыходзяць супрацоўнікі міліцыі. Пасля 2006 гады я фактычна не магу пражываць на месцы рэгістрацыі», - заявіў ён.

Вінярскі распавёў, як праходзяць прэвентыўныя затрыманні. «Падыходзяць некалькі чалавек (гэта можа быць АМАП, наркакантроль, крымінальны вышук, нават аддзел барацьбы з арганізаванай злачыннасцю), прапануюць прайсці з імі. Калі затрымліваюць два чалавекі, яны могуць пяць хвілін паўпрошваць. Калі тры ці чатыры, то цябе проста валакуць у аўто і вязуць у аддзел міліцыі», - сказаў ён.

Са слоў Вінярскага, «з моманту, калі цябе затрымалі, ты фактычна цалкам выключаны з прававога поля». «Твае правы больш не цікавяць. Лёгка пісаць у метадычках, якія правы ты маеш у міліцэйскім пастарунку, але зрэалізаваць іх практычна немагчыма. Мне нават не прапаноўваюць штосьці падпісаць, могуць мяняць артыкул, паводле якога затрымліваюць. Выкананне патрабаванняў аб запрашэнні ў суд сведак абароны, запрашэнні адваката, відавочна, існуе толькі ў міфічным прававым полі», - адзначыў актывіст.

Як далей будзе развівацца сітуацыя з ілжывымі сведчаннямі супрацоўнікаў праваахоўных органаў падчас судоў, Вінярскі прадказаць не бярэцца. «Але ніякіх абмежаванняў самі міліцыянты тут для сябе не бачаць. Калі ім можна хлусіць у адміністрацыйным справе, пасля чаго чалавеку даюць 25 дзён адміністрацыйнага арышту, то чаму не падмануць, што ён кагосьці абразіў, штурхнуў, чаму не сказаць, што быў супраціў. Ну і што, калі гаворка ўжо можа ісці пра крымінальны пераслед невінаватага», - сказаў ён.