Расея пачала праверку сумнеўных грузаў з Беларусі

Федэральная мытная служба РФ і Рассельгаснагляд пачалі правяраць сумнеўныя грузі з Беларусі на складах у Смаленскай вобласці.

Пра гэта паведаміў сёння кіраўнік мытнага ведамства суседняй краіны Андрэй Бельянінаў, паведамляе "Інтэрфакс".

"Аўтамабілі з прадуктамі харчавання, якія выклікаюць некаторыя сумневы ў нас і ў нашых беларускіх калег, накіроўваюцца на склады часовага захоўвання, якія знаходзяцца ў Смаленскай вобласці, і там спецыялісты Рассельгаснагляду і пры неабходнасці нашы вядуць ацэнку сапраўднасці дакументаў, а галоўнае - тых прадуктаў, якія заяўляюцца", - заявіў ён.

Андрэй Бельянінаў адзначыў, што не рэдкія выпадкі, калі аўтамабілі з Беларусі вяртаюцца назад, і беларускія калегі суправаджаюць іх да межаў Мытнага саюза.

"У нас ёсць далейшыя планы ў развіцці такога роду мабільнай рэакцыі на тыя выклікі, якія нам даводзіцца развязваць. Але хацеў бы сказаць, што мы можам рабіць 100% дагляд, але тады гэта азначае, што мы проста спынім усю мяжу і спынім увесь бізнэс" , - адзначыў кіраўнік ФМС.

Ён выказаў меркаванне, што асноўная колькасць удзельнікаў замежнаэканамічнай дзейнасці з'яўляецца добрапрыстойнай, і мытня не хацела б кідаць на іх цень падазрэння.

"Так што ў нас ёсць сістэма кіравання рызыкамі, у выніку якой мы праводзім выбарачны кантроль, які часам бывае эфектыўным у дачыненні да нядобрасумленных удзельнікам. Пакуль у такой стадыі развіцця ў нас мабільныя групы", - адзначыў Андрэй Бельянінаў. - Я хачу сказаць, што па дарогах за аўтамабілямі ніхто ганяцца не збіраецца, і пагоні ў стылі action бліжэйшым часам нам не пагражаюць".