Матч БАТЭ - «Дынама» пройдзе 1 лістапада

Пачатак матча - а 14:00.

Цэнтральны матч 29-га тура чэмпіянату Беларусі паміж менскім «Дынама» і барысаўскім БАТЭ адбудзецца ў суботу, 1 лістапада. Паядынак будзе паказаны ў прамым эфіры тэлеканалам «Беларусь-5». Пра гэта гаворыцца ў афіцыйным паведамленні Беларускай федэрацыі футбола.

«29 кастрычніка ў адрас Асацыяцыі «Беларуская федэрацыя футбола» паступіў ліст ад ФК «Дынама-Менск» з просьбай у мэтах пашырэння аўдыторыі гледачоў разгледзець магчымасць пераносу матчу 29-га тура «Беларусбанк - чэмпіянату Рэспублікі Беларусь у футболе сезона 2014 сярод каманд вышэйшай лігі» паміж камандамі «Дынама-Менск» і БАТЭ з 2014/10/31 г. на 2014/11/01 г.

З прычыны сітуацыі, якая склалася, дэпартамент у правядзенні спаборніцтваў АБФФ прыняў пастанову аб пераносе названага матчу з 2014/10/31 г. на 2014/11/01 г. Матч пачнецца а 14:00 і будзе паказаны ў прамым эфіры на тэлеканале «Беларусь 5», - гаворыцца ў паведамленні.

Гэты час пачатку сустрэчы абумоўлены інтарэсамі шматлікіх заўзятараў, якія змогуць наведаць як футбольны матч, так і гульню Кантынентальнай хакейнай лігі паміж ХК «Дынама» (Менск) і ХК «Сібір». Месца правядзення - «Менск-Арэна», пачатак а 17:00. Таксама пры вызначэнні часу ўлічваўся расклад электрацягнікоў з Барысава ў Менск (прыбыццё а 12.54 і 14.30).