Справа супраць дырэктара-хабарніка гарадзенскага тэхнапарку перададзеная ў суд

СК завяршыў расследаванне крымінальнай справы ў дачыненні да дырэктара гарадзенскага тэхнапарку.

Пра гэта charter97.org паведамілі ў прэс-службе СК Беларусі.

«Службовая асоба, з'яўляючыся старшынёй конкурснай камісіі, створанай для вядзення дзяржаўных закупак за кошт бюджэтных грашовых сродкаў, атрымала ад прадстаўніка камерцыйнай арганізацыі ў якасці хабару грашовыя сродкі ў суме блізу 32 тыс еўра за садзейнічанне ў перамозе ў электронных таргах у набыцці тэхнапаркам кампрэсарнага абсталявання. Абвінавачаны асабіста падрабіў подпісы сябраў камісіі і накіраваў аўкцыённыя дакументы ў Гарадзенскі абласны выканаўчы камітэт», - распавялі ў СК.

Пасля на падставе заключанага дагавора на рахунак камерцыйнага прадпрыемства з дзяржаўнага бюджэту паступіла больш Br1,1 млрд, што значна перавышае рэальны кошт абсталявання. «Шкода, нанесеная дзяржаве, склала блізу Br1 млрд», - адзначылі там.

Падчас расследавання крымінальнай справы старанна вывучаная дакументацыя прадпрыемства, у выніку чаго атрыманыя доказы аб дадатковых фактах супрацьпраўнай дзейнасці службовай асобы.

Былы кіраўнік, злоўжываючы службовымі паўнамоцтвамі, незаконна атрымліваў грашовыя сродкі тэхнапарку ў якасці заработнай платы за перыяды адсутнасці на працоўным месцы без паважных прычын. У агульнай складанасці яму неабгрунтавана было пералічана на карт-рахунак больш Br13 млн.

Дзеянні абвінавачанага кваліфікаваны паводле ч.3 арт.430 (атрыманне хабару ў буйнай суме), ч.3 арт.424 (злоўжыванне службовымі паўнамоцтвамі, што пацягнула цяжкія наступствы), ч.1 арт.210 (крадзеж шляхам злоўжывання службовымі паўнамоцтвамі) Крымінальнага кодэкса Беларусі . Да яго ўжытая мера стрымання ў выглядзе заключэння пад варту.

Крымінальная справа перададзена пракурору для накіравання ў суд.