Сумар назапасіўся прадуктамі на зіму

У Берасцейскай вобласці створаныя стабілізацыйныя фонды для забеспячэння насельніцтва прадуктамі.

Пра гэта паведаміў намеснік начальніка ўпраўлення гандлю і паслуг Берасцейскага аблвыканкама, начальнік аддзела Валерый Мацкевіч, піша БелТА.

У мэтах бесперабойнага забеспячэння насельніцтва харчовымі таварамі на міжсезонны перыяд 2014/2015 года была прынятая адмысловая пастанова аблвыканкама, у адпаведнасці з якой усім гаррайвыканкамамі былі вызначаныя заданні. Усе планы выкананыя ў поўным аб'ёме.

У прыватнасці, закладзена на захоўванне 4,95 тыс. т бульбы і 7,26 тыс. т агародніны, у тым ліку капусты - 3,3 тыс. т, морквы - 1,32 тыс. т, буракоў - 1,1 тыс. т, цыбулі - 1,54 тыс. т. Закладку бульбы і гародніны забяспечылі гандлёвыя арганізацыі гарадоў (ТПУКП «Плодагародніна», ААТ «Поўнач-Пінск»), нарыхтоўчыя арганізацыі спажывецкай кааперацыі, фермерскія гаспадаркі і сельскагаспадарчыя арганізацыі.

Акрамя таго, кіруючай кампаніяй холдынгу «Канцэрн Брэстмясамалпрам» забяспечаны запас жывёлагадоўчай прадукцыі: у стабфонды закладзена 200 т масла, 300 т сыру, 200 т ялавічыны.

Са слоў суразмоўцы, цяпер у рэгіёне арганізаваны бесперабойны гандаль бульбай і свежай гародніннай айчыннай вытворчасці. Іх продаж вядзецца больш чым у 2 тыс. гандлёвых аб'ектаў. Таксама для рэалізацыі сельскагаспадарчай прадукцыі маецца блізу 3 тыс. месцаў на рынках. Акрамя гэтага, у 11 гарадах і райцэнтрах вобласці дадаткова вызначаныя 73 пляцоўкі для штодзённага гандлю сельскагаспадарчай прадукцыяй.

Плюс да ўсяго, жыхары рэгіёну мелі магчымасць стварыць уласныя запасы харчовых тавараў першай неабходнасці. Паводле інфармацыі галоўнага спецыяліста ўпраўлення Святланы Сухарэвіч, з 20 верасня да 2 лістапада ў гарадах і раённых цэнтрах вобласці прайшлі 72 восеньскія кірмашы ў продажы сельскагаспадарчай прадукцыі, дароў лесу, прадукцыі рыбгасаў і пчалапасек, харчовых і нехарчовых тавараў.

У распродажах бралі ўдзел больш за 2,8 тыс. прадпрыемстваў, арганізацый, у тым ліку 1700 фізічных асоб. Усяго на сельскагаспадарчых кірмашах было рэалізавана 4,5 тыс. т плодаагародніннай прадукцыі (у 2013 годзе - 4 тыс. т). У тым ліку бульбы прададзена 1,9 тыс. т (у 2013 годзе - 2,2 тыс. т). Капусты, морквы, буракоў жыхары вобласці набылі прыкладна столькі ж, колькі і летась.