The Wall Street Journal: Ціск на расейскі рубель будзе расці

На мінулым тыдні расейскі рубель упаў амаль на 8% да даляра, а ў гадавым вымярэнні ён страціў у цане 29,4%.

Гэтая дынаміка пачала выклікаць непакой наконт фінансавай стабільнасці. І ўсё гэта нягледзячы на тое, што ЦБ РФ у гэтым годзе павысіў уліковую стаўку на 4 працэнтныя пункты да 9,5% і толькі ў кастрычніку выдаткаваў на падтрыманне нацыянальнай валюты каля 30 млрд даляраў. Сваю ролю адыгралі санкцыі, геапалітыка і змрочныя прагнозы наконт будучыні расейскай эканомікі, піша The Wall Street Journal (пераклад - Инопресса.ру).

"Цяпер у Цэнтрабанку прыдумалі новую стратэгію. Рубель адпусцілі ў вольнае плаванне, хоць пагроза інтэрвенцый для рынку па-ранейшаму захоўваецца. Гэта прагрэс у параўнанні з ранейшай стратэгіяй Цэнтрабанка, якая прадугледжвала сістэматычныя, паступовыя інтэрвенцыі, якія служылі мішэнню для тых, хто ставіў на паніжэнне курса рубля: расейскі Цэнтрабанк марнаваў рэзервы без усякага выніку. Але нават з улікам таго, што ў Расеі ўсё яшчэ застаецца велізарны - больш за 400 млрд даляраў - валютны рэзерв, які можна выкарыстоўваць як сродак стрымлівання спекуляцый, інтэрвенцыі павінны быць пераканаўчымі. Калі ЦБ няслушна ацэніць сітуацыю на рынку, інтэрвенцыя можа прывесці да непажаданых вынікаў", - гаворыцца ў артыкуле.

На думку выдання, у доўгатэрміновай жа перспектыве шмат будзе залежаць ад таго, як доўга яшчэ будуць доўжыцца санкцыі Захаду супраць Расеі. Расейскім банкам і кампаніям, якія страцілі доступ да міжнародных фінансавых рынкаў, трэба абслугоўваць запазычанасць у замежнай валюце, і павышаны попыт на даляры, мабыць, зыходзіць ад іх... Нагоду для больш сур'ёзнай боязі дадуць фізічныя асобы, калі пачнуць масава пераводзіць рублёвыя актывы ў даляры. У звестках за жнівень такой тэндэнцыі не відаць, але калі сфармуецца ўяўленне пра тое, што рубель працягне падзенне, гэта можа перарасці ў вялікую праблему.

"Пакуль дзейнічаюць санкцыі, попыт на даляры захаваецца, і рубель будзе адчуваць ціск. Тым часам эканамічныя перспектывы (на фоне падзення коштаў на нафту і зніжэння шанцаў на замежныя інвестыцыі) становяцца ўсё больш туманнымі. Інфляцыя перавышае 8%, эканоміка пераходзіць у фазу стагнацыі. Канфрантацыя паміж Расеяй і Захадам, падобна, не слабее, а толькі нарастае. Рубель і далей будзе даваць падставы для турботы", - мяркуе карэспандэнт.