Кітайцы ўзброілі гусенічнага робата драбавіком
5- 12.11.2014, 21:24
- 9,049
Апарат прызначаны для выведвальных і ўдарных місій.
Кітайская кампанія Norinco прэзентавала на выставе Airshow China 2014 у Чжухае гусенічнага баявога робата UGV (unmanned ground vehicle, Battle Robot). Як паведамляе Jane's, апарат прызначаны для выведвальных і ўдарных місій у гарадскіх умовах і на адкрытай мясцовасці і ўзброены самазарадным драбавіком QBS 09 (Type 09) дванаццатага калібра (18,5 міліметра). Акрамя драбавіка на ўзбраенні робата таксама можа стаяць пісталет-кулямёт, піша Lenta.ru.
Згодна з інфармацыяй вытворцы, UGV мае модульную канструкцыю, дзякуючы чаму яго лёгка аптымізаваць пад канкрэтную задачу або аснасціць дадатковым абсталяваннем. Напрыклад, замест зброі на Battle Robot можна ўстанавіць маніпулятары, з дапамогай якіх апарат здольны абясшкоджваць выбуховыя прылады. Акрамя таго, прыладу можна забяспечыць дадатковымі датчыкамі і сістэмамі тэхнічнага гледжання.
У камплекце з робатам ідзе перадатчык, які можна несці ў заплечніку, і партатыўны пульт кіравання з дысплеем. Таксама ў базавай версіі Battle Robot абсталёўваецца дзённай камерай высокага дазволу і датчыкамі руху. Больш падрабязныя характарыстыкі UGV, як і ягоны рынкавы кошт, не ўдакладняюцца.
Раней стала вядома, што ў чэрвені 2014 Norinco адкрыла ў Пекіне прадпрыемства ў распрацоўцы UGV. Як паведамлялася, робатаў планавалася выпускаць як для патрэб кітайскіх вайскоўцаў, сілавікоў і грамадзянскіх службаў, так і на экспарт.
Фота: IHS