Барыс Нямцоў: Пуцін гатовы да санкцый і працягне вайну

Крэмль пачынае жыць у рэальнасці другой халоднай вайны

Пра гэта адзін з лідараў расейскай апазіцыі Барыс Нямцоў напісаў у сваім блогу на сайце радыёстанцыі «Эхо Москвы».

Уладзімір Пуцін «будзе працягваць вайну і канфрантацыю з усім светам. Яму пляваць на эканоміку і праблемы грамадзян, якія безумоўна будуць ад санкцый пакутаваць. Ён хоча правіць да 2024 года, гэта значыць, яшчэ 10 гадоў і пытання пра пераемніка ў 18 годзе не існуе. Пуцін сказаў рыхтавацца да санкцый на працягу 10 гадоў».

Такія планы Пуціна, са слоў Нямцова азначаюць для Расеі двухзначны рост коштаў, падзенне даходаў людзей і зніжэнне ўзроўню жыцця.

«Дэвальвацыя працягнецца не толькі праз падаючую нафту, але і дэфіцыт валюты. Вельмі верагодны банкаўскі крызіс, банкруцтва банкаў. Неўзабаве магчымыя абмежаванні на выдачу ўкладаў і пераводы, асабліва ў замежнай валюце. На фоне інфляцыі эканоміка будзе падаць, - адзначыў апазіцыянер. - Мы жывем у новай рэальнасці, дарагія мае. Рэальнасці другой халоднай вайны. Папярэднюю халодную вайну СССР прайграў і разваліўся. Верагоднасць прайграць новую халодную вайну велізарная. З той простай прычыны, што занадта вялікая розніца паміж эканамічным патэнцыялам Захаду і Расеі. Розніца гэтая ў 16 разоў! Расея - гэта ўсяго толькі 6% ад эканомікі Еўропы і Амерыкі. 6% - запомніце гэтую лічбу. Пара вывучаць досвед жыцця Ірана ва ўмовах шматгадовых санкцый і працягваць барацьбу з русафобскай уладай у Крамлі».