Адміністрацыя «Менск-Арэны» зняпраўдзіла МЗС Беларусі

На канцэрце «Акіяна Эльзы» ахова адбірала ў гледачоў украінскія сцягі, каб пазбегнуць палітычных акцый.

Пра гэта заявіў намеснік генеральнага дырэктара спарткомплексу «Менск-Арэна» Мікалай Сергіенка, піша БелаПАН.

«Паводле правіл, на «Менск-Арэне» правядзенне розных мітынгаў, маніфэстацый, рэкламных акцый, не ўстаноўленых дамоўнымі дачыненнямі, забаронена, - растлумачыў ён. - Сцягі забіраць права не мелі, бо гэта асабістыя рэчы, таму ахова прапаноўвала здаць іх у камеру захоўвання».

На пытанне, ці можна прыраўняць дэманстрацыю дзяржаўнага сцяга Украіны да правядзення мітынгу, намеснік гендырэктара «Менск-Арэны» адказаў: «Гэта не так. Але калі б у гледачоў былі сцягі іншых дзяржаў, маглі б адбыцца розныя палітычныя акцыі. Калі б са сцягамі зайшлі ў залу, іх давялося б адбіраць там, а гэта яшчэ горш. Мы ніколі не дазваляем праходзіць з любой сімволікай, не дазволенай у рэгламенце правядзення мерапрыемства. У той жа час, калі б гулялі ў хакей каманды Украіны і Беларусі, ніхто не забараніў бы праносіць сцягі гэтых дзяржаў. Іншая справа, калі прывязуць іншыя сцягі».

Акрамя таго, дадаў Сергіенка, канцэрт «Акіяна Эльзы» меў «спрэчную аснову, так як група трошкі альтэрнатыўная». «Мы іх папярэдзілі, каб яны вялі сябе годна. Гэтыя песні - напрыклад «Уставай» і іншыя... Мы ўзгаднялі з імі, каб яны не спявалі пэўныя песні. Не таму, што мы супраць гэтых песень, мы не хочам нагнятання абстаноўкі ў зале, каб людзі паставіліся да таго, што адбываецца неадназначна і гэта вылілася ў нейкія ненармальныя стасункі», - сказаў намеснік гендырэктара спарткомплексу.

У сваю чаргу прадстаўнік прыватнага ўнітарнага прадпрыемства «Акула прамоўшн», якое было арганізатарам канцэрта, паведаміў: пастанова не дапускаць з'яўлення ўкраінскай сімволікі ў зале «Менск-Арэны» была прынятая кіраўніцтвам унутраных спраў Менгарвыканкама.

Атрымаць каментар у УУС пакуль не ўдаецца.

МЗС Беларусі растлумачыў інцыдэнт падчас канцэрту «Акіяна Эльзы» ў Мінску, калі амапаўцы адбіралі ўкраінскія сцягі, клопатам пра гледачоў.

«Па дадзеных МУС, калі на канцэрце аншлаг, тое ж самае было б і з нашым сцягам, каб не перашкаджаў гледачам. Любяць у нас Акіян Эльзы! »- Гаворыцца ў афіцыйным твітэр МЗС Беларусі ў адказ на адпаведнае пытанне прэс-сакратара МЗС Украіны Яўгена Перабійніс.

Кіраўнік ўкраінскага знешнепалітычнага ведамства падзякаваў беларускіх калег, аднак выказаў сумнеў, «каб міліцыя з такім жа азвярэннем і непавагай паводзіла сябе з беларускім сцягам».