Мясніковіч просіць ЕЗ скасаваць санкцыі

Беларусь разлічвае, што Еўразвяз скасуе абмежаванні на працу з фінансавымі арганізацыямі краіны.

Пра гэта заявіў кіраўнік беларускага ўрада Міхаіл Мясніковіч на пленарным пасяджэнні Беларуска-літоўскага эканамічнага форуму ў Магілёве, піша БелТА.

«Мы спадзяемся, што наступным крокам стане скасаванне абмежаванняў на перамяшчэнне капіталу, і гэта будзе лагічнай пастановай», - сказаў Мясніковіч.

Ён адзначыў, што Беларусь і ЕЗ ужо выбудавалі «дастаткова актыўны дыялог», і дадаў, што Еўразвязам ужо прыняты «цэлы шэраг пазітыўных пастаноў» у дачыненні да Беларусі.

Кіраўнік урада таксама нагадаў, што беларускі бок абмяркоўваў магчымасць скасавання абмежаванняў на перамяшчэнне капіталу з боку ЕЗ падчас беларуска-амерыканскага інвестыцыйнага форуму, які нядаўна прайшоў у Нью-Ёрку.

«Ёсць разуменне таго, што трэба ісці па шляху зняцця ўсіх абмежаванняў у працы з беларускімі фінансавымі і не толькі арганізацыямі», - сказаў Мясніковіч.

Са слоў прэм'ер-міністра, ёсць усе падставы меркаваць, што еўрапейскія партнёры ўсвядомілі: палітыка санкцый і ультыматумаў абсалютна бесперспектыўная, такім шляхам немагчыма выбудоўваць нармальныя стасункі.

Як паведамлялася, 30 кастрычніка Рада Еўразвяза сваёй пастановай працягнула тэрмін дзеяння санкцый супраць Беларусі да 31 кастрычніка 2015 г. У той жа час быў перагледжаны спіс беларускіх грамадзян і арганізацый, у дачыненні да якіх будуць і далей прымяняцца абмежавальныя меры. Санкцыі былі скасаваныя для 24 чалавек і 7 прадпрыемстваў.

У той жа час ЕЗ падкрэсліў, што «гэта пастанова не адлюстроўвае якіх-небудзь змяненняў у палітыцы ЕЗ у дачыненні да Беларусі, як гэта было выкладзена ў высновах Рады ад 15 кастрычніка 2012 года».

«ЕЗ падтрымлівае сваю палітыку крытычнага ўзаемадзеяння з Беларуссю, прызначаную для садзейнічання павазе правоў чалавека, вяршэнства закона і дэмакратычных прынцыпаў у Беларусі», - адзначалася ў паведамленні прэс-службы Рады ЕЗ.