«Палатка» прагаласавала за павелічэнне падаходнага падатку
54- 11.12.2014, 12:33
- 40,366
«Дэпутаты» прынялі ў першым чытанні законапраект аб унясенні змяненняў у Падатковы кодэкс.
Законапраект прадугледжвае павышэнне стаўкі падаходнага падатку з 12% да 13%. Гэтыя сродкі пойдуць на падтрымку сем'яў з дзецьмі, падкрэсліў міністр фінансаў Уладзімір Амарын, прапануючы законапраект у «палаце прадстаўнікоў».
Праект закона таксама прадугледжвае павелічэнне стаўкі акцызаў на ўсе групы падакцызных тавараў, за выключэннем аўтамабільнага паліва і піва. У прыватнасці, на моцны алкаголь акцызы падвысяцца на 6%, на цыгарэты - на 15-30%. У той жа час прапануецца знізіць стаўкі акцызаў на нафтапрадукты ў сярэднім на 22% да ўзроўню 2014 года.
Акрамя таго, плануецца павялічыць стаўку падатку на прыбытак для банкаў і страхавых арганізацый з 18% да 25%. У мэтах пашырэння рэсурснай базы бюджэтаў прапануецца ўвесці спецыяльны збор за права экспарту сырой нафты, якая здабываецца ў Беларусі.
Узровень падатковай нагрузкі ў 2015 годзе без уліку мытных пошлін складзе 23,6% ВУП і не вырасце ў параўнанні з 2014 годам. Уладзімір Амарын звярнуў увагу, што законапраектам прадугледжваецца спрашчэнне падатковага адміністравання і іншыя меры, якія дазваляюць спрасціць прымяненне падатковага заканадаўства.
Намеснік старшыні пастаяннай камісіі бюджэта і фінансаў Аляксандр Мякінік, які выступіў судакладчыкам законапраекту, дадаў, што дакумент надае пенсіянерам, інвалідам I і II групы 50% льготу на выплату дзяржаўнай пошліны за выдачу дазволу на допуск транспартнага сродку да ўдзелу ў дарожным руху.