Магілёўца высяляюць з кватэры праз запазычанасць

Беспрацоўнага вінаватага за камунальныя паслугі хочуць выселіць з жылля ў Магілёве.

Наймальнікам трохпакаёвай кватэры па вуліцы Фаціна агульнай плошчай 66,3 м2 з'яўляецца 30-гадовы В. Капытаў. Паводле стану на 1 лістапада сума асноўнай запазычанасці перавысіла 7 млн рублёў, пеня за пратэрміноўку плацяжоў склала 12 млн рублёў, піша мясцовы сайт MyCity.

За апошнія тры гады работнікі Цэнтра гарадскіх інфармацыйных сістэм неаднаразова наведвалі неплацельшчыка, уручалі пісьмовыя папярэджанні, рабілі адключэнне ад некаторых відаў камунальных паслуг. За гэты час яны аформілі 17 выканаўчых надпісаў на суму 15,1 млн рублёў. Аднак наймальнік гэтага жылога памяшкання не распачаў ніякіх мер для пагашэння запазычанасці.

ЦГІС быў вымушаны падрыхтаваць пакет дакументаў для высялення і перадаць яго ў ЖРЭУ Кастрычніцкага раёна Магілёва, якое ў сваю чаргу звярнулася з позвай у суд з патрабаваннем скасаваць дагавор найму і выселіць даўжніка. Суд заяву прыняў і распачаў у дачыненні да В. Капытава грамадзянскую справу.

У лістападзе ўжо адбылося першае судовае пасяджэнне. Адказчык на яго не з'явіўся, у выніку чаго разгляд гэтай справы быў перанесены на 5 снежня. Вінаватаму жа падалі адтэрміноўку для аплаты запазычанасці, якая ўтварылася, у добраахвотным парадку.

Калі ж малады чалавек не аплаціць запазычанасць за жыллёва-камунальныя паслугі, яго пераселяць у іншае жылое памяшканне з горшымі ўмовамі, размешчанае на вуліцы Астроўскага, агульнай плошчай 20,7 м2.