Англія заклікае правесці ЧС у лёгкай атлетыцы без Расеі

Міжнародная асацыяцыя лёгкаатлетычных федэрацый (ІААФ) расследуе факты ўжывання допінгу расейскімі спартсменамі.

Журналіст адной з самых вядомы газет у свеце The Times Рык Бродбент лічыць, што калі сістэматычнае выкарыстанне допінгу ў расейскай лёгкай атлетыцы будзе даказанае, чэмпіянат свету 2015 у Пекіне варта правесці без удзелу Расеі, піша РБК.

У сераду на нямецкім тэлеканале ARD быў паказаны дакументальны фільм аб выкарыстанні забароненых прэпаратаў спартсменамі з Расеі. Сусветнае антыдопінгавае агенцтва (WADA) ужо заявіла, што правядзе дбайнае расследаванне ўсіх фактаў, згаданых журналістамі з Нямеччыны. Тым не менш антыдопінгавае агенцтва аддае перавагу дачакацца вынікаў расследавання Міжнароднай асацыяцыі лёгкаатлетычных федэрацый (ІААФ), якая стварыла незалежны камітэт этыкі для праверкі ўсёй інфармацыі пра допінг у Расеі.

У фільме, у прыватнасці, прыводзіцца відэазапіс з удзелам алімпійскай чэмпіёнкі ў бегу на 800 метраў Марыі Савінавай, зроблены на мабільны тэлефон восенню гэтага года. Са сцвярджэння аўтараў фільма, на тэлефон была знятая менавіта Савінава, якая распавядае, як яна дамагалася поспеху пры дапамозе допінгу. Пры гэтым твар спартсменкі відаць невыразна і не чуваць, што менавіта яна гаворыць па-руску, - дадзены толькі пераклад яе слоў на нямецкую.

У гэтым запісы спартсменка кажа, што ўжывала Аксандралон, які дазваляе аднаўляць сілы менш чым за 20 дзён. Паводле яе слоў, хаваць ўжыванне допінгу ёй дапамагалі трэнеры. На відэазапісы таксама паказана, як нейкі мужчына дае спартсменам лекі - паводле сцвярджэння журналіста, на запісы відаць, як трэнер Савінавай Уладзімір Казарын выдае Аксандралон.

Бродбент сцвярджае, што абвінавачванні нямецкіх дакументалістаў не сталі нечаканасцю для большасці лёгкаатлетаў ва ўсім свеце. Ён лічыць, што дыскваліфікацыя асобных спартсменаў была атакай на сімптомы хваробы. На думку журналіста The Times, справіцца з прычынамі захворвання можна толькі пры ўмове дыскваліфікацыі ўсёй краіны.

Бліжэйшы чэмпіянат свету ў лёгкай атлетыцы адбудзецца 22-30 жніўня 2015 у сталіцы Кітая Пекіне на знакамітым алімпійскім стадыёне, празваным «птушыным гняздом». Папярэдняе першынство планеты прайшло ў мінулым годзе ў Маскве ў «Лужніках». У агульным заліку перамогу атрымалі расейскія атлеты, якія заваявалі сем залатых медалёў.

На вышэйшую прыступку п'едэстала падымаліся хадакі на 20 км Аляксандр Іваноў і Кацярына Лашманова, скакуха ў вышыню Алена Ісінбаева, кідальніца молата Таццяна Лысенка, скакун у даўжыню Аляксандр Мянькоў, скакуха ў вышыню Святлана Школіна і жаночая эстафетная каманда (4х400 метраў) у складзе Юліі Гушчынай, Таццяны Фіравой, Ксеніі Рыжовай і Антаніны Крывашапкі.

Напярэдадні кіраўнік Федэрацыі лёгкай атлетыкі Вялікабрытаніі Эд Уорнер заклікаў Міжнародную асацыяцыю лёгкаатлетычных федэрацый (ІААФ) як мага хутчэй расследаваць усе факты ўжывання допінгу, адзначаныя ў фільме тэлеканала ARD.

«Мы не можам чакаць цэлы год. Неабходна, каб расследаванне завяршылася ўжо праз некалькі тыдняў. Не хацелася б пачынаць новы 2015-ы лёгкаатлетычны год з цяжкім грузам допінгавых падазрэнняў. Было б жахліва адправіцца ў Прагу на сакавіцкі чэмпіянат Еўропы ў закрытых памяшканнях з пачуццём нявызначанасці. Трэба паставіць усе кропкі над i ў самы бліжэйшы час», - цытуе Уорнера The Guardian.

Акрамя відэазапісу з удзелам Савінавай у фільме прыводзяцца і іншыя сведчанні ўжывання допінгу ў расейскім спорце. Бягуха на 800 метраў Юлія Сцяпанава, да замужжа насіла прозвішча Русанава, распавяла аўтарам фільма пра тое, што старшы трэнер зборнай Расеі ў лёгкай атлетыцы Аляксей Мельнікаў мае непасрэднае дачыненне да выкарыстання спартсменамі допінгу. У лютым 2013-га расейка была дыскваліфікаваная на падставе паказанняў крыві ў яе біялагічным пашпарце, якія прыкметна адрозніваліся ад нормы.

«У Расеі немагчыма дамагчыся высокіх вынікаў без ужывання забароненых прэпаратаў. Допінг - нашая звычайная практыка. Трэнеры і афіцыйныя асобы спартыўных федэрацый актыўна ўдзельнічаюць у гэтым працэсе.

Для заваёвы медалёў на міжнародных спаборніцтвах расейскім спартсменам трэба дапамагаць. Гэтай дапамогай з'яўляецца выкарыстанне допінгу», - заявіў адмыслова для ARD муж Юліі Сцяпанавай Віталь Сцяпанаў - былы супрацоўнік Расейскага антыдопінгавага агенцтва (РУСАДА).

Сама Сцяпанава заявіла нямецкім журналістам, што на трэніровачных зборах расейскія спартсмены нярэдка рэгістраваліся ў гасцініцах пад чужымі імёнамі. Такім чынам, ім атрымоўвалася падстрахавацца на выпадак візіту афіцэраў WADA. Акрамя таго, з яе слоў, трэнер параіў ёй заўсёды трымаць у халадзільніку бутэлечку з «чыстай» мачой.

Лілія Шабухова, якая перамагла ў вялікай колькасці прэстыжных марафонскіх забегаў, у тым ліку ў Чыкага і Лондане, распавяла пра тое, што Усерасейская федэрацыя лёгкай атлетыкі патрабавала ад яе 450 тысяч еўра. За гэтыя грошы расейцы абяцалі вырашыць усе яе праблемы з допінгам напярэдадні Алімпіяды ў Лондане.

На Гульнях-2012 яна была адной з фаварытаў на марафонскай дыстанцыі, але праз траўму задняй паверхні сцягна сышла на 23-м кіламетры. У 2013 годзе Шабухова была дыскваліфікаваная з той жа фармулёўкай, што і Русанава - «анамальныя паказчыкі гематалагічнага профілю біялагічнай пашпарта». Усе яе вынікі з 2009 года былі ануляваныя, а Федэрацыя вярнула спартсменцы толькі дзве траціны ад выплачанай сумы.

«Адвакат забараніў мне даваць якія-небудзь каментары», - адзначыла Шабухова. На пытанне, ці азначае наяўнасць адваката судовае разбіральніцтва Шабуховой з Усерасейскай федэрацыяй лёгкай атлетыкі, спартсменка адказала станоўча.

Між тым аўтар фільма нямецкі журналіст Хаё Зепельт заявіў, што расейскія спартсмены перад Алімпіядай у Сочы выкарыстоўвалі новы від допінгу.

«Паводле маіх звесткак, расейскія спартсмены перад Алімпіядай выкарыстоўвалі ксенон і новы від допінгу пад назвай Full Size MGF. Я вёў сваё расследаванне з сакавіка і магу сказаць, што ўжыванне допінгу ў Расеі падтрымліваецца на дзяржаўным узроўні», - распавёў Зепельт у інтэрв'ю Sportschau.de.

«Я падарожнічаў па Расеі. Некаторыя спартсмены не хацелі казаць, таму што баяліся. Яны сказалі, што ім пагражаюць. Казаць пра допінг у Расеі небяспечна, але некалькі смельчакоў намалявалі мне ўзрушаючую карціну рэалій расейскага спорту. Антыдопінгавыя лабараторыі ў Расеі пакрываюць спартсменаў, якія ўжываюць допінг. У Расеі шмат праверак, але гэта ўсяго толькі паказуха», - падкрэсліў журналіст.