ЗВР Беларусі скараціліся на $202 мільёны

Улады зноў абвінавацяць насельніцтва. Але насельніцтву гэтыя абвінавачванні ўжо да лямпачкі.

Золатавалютныя рэзервы Беларусі (у адпаведнасці з метадалогіяй МВФ) на 1 снежня 2014 года склалі 5821,0 млн. даляраў, збяднеўшы на 202,9 млн. даляраў за лістапад, паведамляе АФН са спасылкай на Нацыянальны статыстычны камітэт РБ.

Зніжэнне ЗВР адбылося нягледзячы на намаганні Мінфіна РБ, дзякуючы руплівасці якога праз продаж валютных аблігацый быў павялічаны ўнутраны валютны дзярждоўг на 196 млн даляраў і 10 млн еўра. Гэтыя сродкі, як правіла, ідуць на абслугоўванне знешняга дзярждоўгу.

Па-за сумнення, асноўны ўклад у зніжэнне ЗВР у лістападзе аказалі грамадзяне краіны, якія вырашылі застрахаваць свае назапашванні і прыбыткі.

Такім чынам, у лістападзе рэзка павялічыўся ператок рублёвых укладаў у валютныя і проста валюту, што ўжо прымусіла шэраг банкаў павысіць працэнтныя стаўкі дэпазітаў з адабрэння (калі не прамога ўказання) Нацбанка РБ, у сваю чаргу забыўшага аб далейшым зніжэнні стаўкі рэфінансавання.

Акрамя таго, на стан ЗВР пачаў аказваць уплыў і анлайнавы шопінг на замежных пляцоўках і крамах. Як паведамлялася, на распродажы з нагоды Дня халасцякоў Aliexpress (кітайскі аналаг амерыканскага Ebay) Беларусь умудрылася заняць 5-е месца паводле аб'ёму заказаў і 3-е месца ў сярэднім кошце адной замовы.

І, безумоўна, жудасную дзірку ў ЗВР праела дэвальвацыя расейскага рубля на фоне коштаў на тавары ў расейскіх рублях, якія не змяніліся. За аўто, бытавой тэхнікай, мэбляй і г.д. ў Расею паехалі хто мог і хто не мог. На рэгістрацыю аўто ў ДАІ стаяць шалёныя чэргі. І ў снежні сітуацыя не зменіцца ў лепшы бок.

З пачатку года рэзервы знізіліся на 829,9 млн. даляраў, на 1 студзеня 2014 года іх аб'ём складаў 6650,9 млн. даляраў. Для параўнання: за 10 месяцаў бягучага года Беларусь імпартавала аўто на суму $800 млн.

Улады зноў абвінавацяць насельніцтва. Але насельніцтву гэтыя абвінавачванні ўжо да лямпачкі.

Даведка: У складзе ЗВР рэзервовыя актывы ў замежнай валюце на 1 снежня 2014 г. склалі 3712,4 млн. даляраў ЗША, знізіўшыся на 223 млн. даляраў ЗША за лістапад 2014 года. Манетарнае золата вырасла на 25,2 млн. даляраў ЗША да 1563,0 млн. даляраў ЗША. Іншыя актывы засталіся на нулявым узроўні. СДР (спецыяльныя правы запазычання МВФ) знізіліся на 5,2 млн. даляраў ЗША да 545,5 млн. даляраў ЗША на 1 снежня 2014 года.