Бамбавік Ту-95 ледзь не збіў пасажырскі самалёт над Масквой

Airbus A319 авіякампаніі Air France KLM ледзь не сутыкнуўся з расейскім стратэгічным бамбавіком-ракетаносцам.

Пра гэта паведамляе газета "Известия" са спасылкай на дасведчаныя крыніцы ў структурах Расавіяцыі. Гендырэктар авіядыспетчарскай Дзяржкарпарацыі па арганізацыі паветранага руху (ФГУП "Дзяржкарпарацыя па АрПР") Ігар Маісеенка пацвердзіў выданню, што па дадзеным інцыдэнце вядзецца праверка.

14 сакавіка Airbus A319 авіякампаніі Air France KLM з бартавым нумарам FG-RXC, які выконваў рэйс AF-1645 па маршруце Масква (Шарамеццева) - Парыж (аэрапорт Шарля дэ Голя) апынуўся на небяспечнай адлегласці ад ваеннага самалёта Ту-95 і ледзь не сутыкнуўся з ім. У гэты час пасажырскі лайнер знаходзіўся пад кіраваннем дыспетчара Маскоўскага цэнтра аўтаматычнага кіравання паветраным рухам (МЦ АКВХ), размешчанага ва Унукава і завяршаў набор вышыні да 8000 метраў. Дыспетчар рыхтаваўся перадаць борт у вядзенне іншага калегі, які адказвае за гэты ўчастак.

"Гэта было на мяжы перадачы кіравання. Французу далі інфармацыю пра тое, што борт, які перасякае, будзе вышэй, і француз пацвердзіў атрыманне гэтай інфармацыі. Але пры выхадзе на «кантроль» (да другога дыспетчара) француз далажыў, што ён раптам для сябе выявіў Ту-95 у небяспечнай блізкасці ад сябе - менш за 100 м - і што будзе пісаць ноту пратэсту, што і зрабіў, паколькі самалёты ледзь не сутыкнуліся адзін з адным", - цытуе газета словы аднаго з авіядыспетчараў. Да моманту небяспечнага збліжэння ваенны самалёт рухаўся з паўднёвага захаду са зніжэннем, у той час як французскі самалёт ішоў на захад з наборам вышыні.

Як раз 14 сакавіка завяршылася перадыслакацыя расейскіх знішчальнікаў і ваенна-транспартных самалётаў на аэрадром Бабруйск у Беларусі, нагадвае "Інтэрфакс".

Гэта ўжо не першы выпадак, калі самалёты над Масквой аказваліся ў небяспечнай блізкасці адзін ад аднаго і толькі цудам удавалася пазбегнуць катастрофы. Апошні падобны інцыдэнт адбыўся 7 лістапада з самалётамі авіякампаній "Трансаэра" і "Ютэйр".