Расейскіх фізікаў больш не пускаюць у лабараторыі ЗША
8- 11.04.2014, 18:44
- 10,964
Расейскім фізікам заблакавалі доступ у вядучыя амерыканскія лабараторыі, падведамныя Міністэрству энергетыкі ЗША.
Пра гэта ў пятніцу, 11 красавіка, паведаміла газета "Коммерсантъ".
Паводле інфармацыі выдання, у лік лабараторый, якія не будуць даступныя расейскім навукоўцам, увайшла Брукхейвенская нацыянальная лабараторыя, у якой праводзяць даследаванні ў галіне ядзернай фізікі.
Паводле ліста Міністэрства энергетыкі ЗША ад 7 красавіка 2014 года, амерыканскія навукоўцы не павінны кантактаваць з расейскімі калегамі. «Наведванне грамадзянамі Расеі аб'ектаў Міністэрства энергетыкі, уключаючы Брукхейвенскую нацыянальную лабараторыю, адкладзенае на нявызначаны тэрмін», - гаворыцца ў дакуменце. Акрамя таго, у тэксце ліста сказана, што амерыканскім фізікам, якія працуюць на Мінэнерга ЗША, забаронены выезд у Расею.
Аднак аўтары ліста адзначаюць, што такія санкцыі не тычацца тых навуковых супрацоўнікаў, якія ўжо працуюць у лабараторыях.