Прызначаныя Крамлём чыноўнікі пабеглі з акупаваных рэгіёнаў Украіны

Калі з'яўляецца магчымасць - з'язджаюць у Расею.

Чыноўнікі, якія адправіліся на працу ў акупаваныя рэгіёны Украіны на заклік Крамля, спрабуюць пакінуць свае пасады для працягу кар'еры ў Расеі, піша «Медуза» са спасылкай на адміністрацыю Пуціна.

Са слоў аднаго з суразмоўцаў выдання, у апошні час тыя, хто займаюць афіцыйныя пасады ў адміністрацыях анэксаваных тэрыторый, успрымаюць сваю працу там «як вахту». «Спачатку [у 2022 годзе] шмат хто яшчэ думаў, што там можна застацца: вайна скончыцца, грошы туды пальюцца ракой. Цяпер такога няма - вайна зацягваецца, людзі затрымаліся ў крэслах. Нават праца на сталай пасадзе ўспрымаецца як вахта. Як з'яўляецца магчымасць - з'язджаюць назад», - адзначыў ён.

26 красавіка стала вядома аб звальненні Аляксандра Кастамарава — першага намесніка кіраўніка адміністрацыі «губернатара» самаабвешчанай «ДНР» Дзяніса Пушыліна. Крыніцы ў АП называлі чыноўніка «мясцовым Сяргеем Кірыенкам», які з'яўляецца куратарам унутранай палітыкі Крамля. У «ДНР» Кастамараў займаўся арганізацыяй «рэферэндуму» аб далучэнні да Расеі і наступных «выбараў», а да гэтага працаваў на аналагічных пасадах ва Ульянаўскай і Ліпецкай абласцях, а таксама ў Падмаскоўі.

Як распавёў знаёмы Кастамарава, той надумаў папрацаваць у Данбасе, каб затым атрымаць губернатарскую пасаду ў адным з рэгіёнаў Расеі. З яго слоў, адзінарос з самага пачатку не збіраўся заставацца ў «ДНР» і пасля прэзідэнцкіх выбараў змог дамовіцца з АП аб заканчэнні свайго знаходжання ў самаабвешчанай «рэспубліцы».

Аднак разлічваць на высокую пасаду ў Расеі Кастамараву пакуль не даводзіцца. Яго знаёмы паведаміў, што сёлета ў Крамлі не плануюць рабіць сур'ёзныя кадравыя перастаноўкі ў губернатарскім корпусе, таму кар'ера чыноўніка, які спрабаваў выслужыцца за кошт працы на акупаваных тэрыторыях, пастаўленая на паўзу.

Услед за Кастамаравым сваю пасаду пакіне «віцэ-губернатар» акупаванай часткі Запарожскай вобласці Сяргей Талмачоў, распавялі дзве крыніцы ў АП. Да гэтага ён займаў аналагічную пасаду ў анэксаваным Севастопалі і кіраваў кампаніямі «Адзінай Расіі» і яе кандыдатаў у рэгіёнах РФ.

Са слоў аднаго з суразмоўцаў, у адрозненне ад Кастамарава, Талмачоў быў не супраць з часам стаць губернатарам адной з анэксаваных тэрыторый, аднак надумаў звольніцца, калі зразумеў, што пасада кіраўніка Запарожскай вобласці яму не свеціць, каб паспрабаваць атрымаць аналагічную пасаду ў Расеі. Гэта пацвярджае і крыніца ў «АР». Кіраваць акупаваным рэгіёнам плануюць паставіць былога віцэ-губернатара Чэлябінскай вобласці і экс-сенатара Ірыну Гехт, якая 27 красавіка ўзначаліла мясцовы «ўрад»

Талмачоў, як і Кастамараў, не атрымае высокую пасаду ў Расеі. Згодна з планам Крамля, ён зоймецца фармаваннем каманд тэхнолагаў для палітблока АП, якія будуць працаваць на рэгіянальных выбарах. «Талмачоў, на задуму ўладаў, павінен стаць у адзін шэраг з умоўнай «ІМой» і іншымі буйнымі гульцамі рынку», – растлумачыла крыніца ў АП.

Тым часам у Крамлі працягваюць прапаноўваць чыноўнікам вакансіі на Данбасе, спрабуючы пераканаць іх, што гэта добры кар'ерны ліфт нароўні з удзелам у баявых дзеяннях. Але, як правіла, падвышэнне пасля працы ў анэксаваных рэгіёнах ці вяртанні з фронту ўсё адно атрымліваюць людзі, якія даўно былі ў кадравым рэзерве ці ўжо адзначыліся ў сістэме ўлады, канстатуюць крыніцы.