Расейская армія каля межаў Украіны прыведзеная ў поўную баявую гатоўнасць

Расейская армія, якая знаходзіцца ў месцах пастаяннай дыслакацыі ў памежных з Украінай абласцях, прыведзеная ў стан поўнай баявой гатоўнасці.

Пра гэта ў «Фэйсбуку» напісаў кіраўнік суполкі «Інфармацыйны супраціў» Дзмітрый Тымчук.

12 красавіка расейскія баевікі і тэрарысты захапілі ў Славянску Данецкай вобласці адміністрацыйныя будынкі, у нядзелю яны працягнулі свае дзеянні ў некалькіх іншых гарадах вобласці. З 6 красавіка ў руках сепаратыстаў застаюцца абласное ўпраўленне СБУ ў Луганску і аблдзяржадміністрацыя ў Данецку.

Учора Савет нацыянальнай бяспекі і абароны прыняў рашэнне аб пачатку маштабнай антытэрарыстычнай аперацыі на ўсходзе краіны. Пра гэта заявіў у сваім звароце спікер Вярхоўнай Рады, в.а. прэзідэнта Украіны Аляксандр Турчынаў. Ён адзначыў, што Савет нацыянальнай бяспекі і абароны Украіны прыняў рашэнне прыцягнуць да правядзення антытэрарыстычнай аперацыі на ўсходзе краіны ваеннаслужачых Узброеных сіл.