Супраць алігарха Курчанкі адкрылі сем крымінальных спраў

На маёмасць і сродкі бізнесмена, якія ацанілі ў адзін мільярд грыўняў, наклалі арышт.

Следчыя "распутваюць клубок" ценявога бізнесу алігарха Сяргея Курчанкі, які ўваходзіў у атачэнне экс-прэзідэнта Віктара Януковіча. Ужо адкрылі сем крымінальных спраў, у якіх фігуруе дзейнасць да 50-ці прадпрыемстваў.

"Следчыя адкрылі адразу сем крымінальных расследаванняў у дачыненні да службовых асоб шэрагу прадпрыемстваў, звязаных з Курчанкам. У прыватнасці, расследуюцца тры факты ўхілення ад выплаты падаткаў у асабліва буйных памерах на суму больш 182 мільёнаў грыўняў, выяўлены факт крадзяжу і наступнай легалізацыі сродкаў у памеры 800 мільёнаў грыўняў, а таксама адкрытыя два крымінальных расследавання па фактах фіктыўнага прадпрымальніцтва, у рамках якіх расследуецца дзейнасць каля 50 фірмаў", - распавялі УНІАН ва ўпраўленні фінансавых расследаванняў Кіеўскага галоўнага ўпраўлення Міністэрства даходаў і збораў Украіны.

Акрамя таго, ужо наклалі арышт на маёмасць і грашовыя сродкі, якія ацанілі ў 1 млрд грн і звязваюць з Курчанкам. Гэта зрабілі дзеля кампенсацыі прычыненых дзяржаве страт. "На сродкі, якія знаходзяцца на банкаўскіх рахунках у памеры каля 700 мільёнаў грыўняў, накладзены арышт. Акрамя таго, прызнаны рэчавым доказам і таксама арыштаваны нафтагазавы комплекс у Херсоне агульным коштам каля 200 мільёнаў грыўняў", - падкрэслілі ў ведамстве. Следчыя працягваюць шукаць іншыя схемы ценявога бізнесу алігарха. Страты, нанесеныя дзяржаве за ўжо раскрытымі схемамі, складаюць, паводле ацэнак следчых, каля 2 млрд грн.

Нагадаем, праверку камерцыйных фірмаў, якія так ці інакш набліжаныя да Курчанкі, Генпракуратура пачала ў сакавіку. Міністр унутраных спраў Арсэн Авакаў заявіў, што МУС раскрыла злачынную схему ўвозу на тэрыторыю Украіны і рэалізацыю нафтапрадуктаў групай кампаній "Усходне-еўрапейская паліўна-энергетычная кампанія" (УЕПЭК), якая належыць Курчанку. Між тым у СМІ з'явілася інфармацыя, нібыта Курченка і сын Януковіча просяць Еўропу "размарозіць" іх актывы.