Арсеній Яцанюк: Лаўроў быў вымушаны падпісаць пагадненне ў Жэневе
12- 18.04.2014, 11:53
- 17,724
Украіна не мае празмернай надзеі ў дачыненні да заявы, падпісанай па выніках чатырохбаковых перамоваў.
Пра гэта заявіў прэм'ер-міністр Украіны Арсеній Яцанюк падчас гадзіны пытанняў да ўрада ў Вярхоўнай Радзе Украіны ў пятніцу раніцай, перадае "Інтэрфакс-Украіна".
"У нас няма ніякіх празмерных чаканняў з нагоды дадзенай заявы", - сказаў ён.
У той жа час прэм'ер падкрэсліў, што Расея падпісалася пад патрабаваннямі да пратэстоўцаў раззброіць і патрабаваннем вызваліць захопленыя адміністрацыйныя будынкі.
"Расея была вымушаная падпісаць заяву і асудзіць экстрэмізм, які фактычна сёння падтрымліваецца Расейскай Федэрацыяй. Падпісаўшы гэтую заяву, Расея фактычна звярнулася да тых "мірным пратэстоўцаў" з аўтаматамі Калашнікава і ПЗРК у руках з патрабаваннем неадкладна раззброіцца і здаць зброю", - заявіў кіраўнік украінскага ўрада.
Разам з тым, ён дадаў: "Расея была вымушаная паставіць подпіс пад тым, каб тыя незаконна сфармаваныя ўзброеныя фармаванні былі неадкладна расфармаваныя, а памяшканні органаў дзяржаўнай улады, міліцыі, СБУ і іншых устаноў былі неадкладна вызваленыя".