Надзвычайнае здарэнне ў Саратаве: правадніца прымушала людзей скакаць з рухомага цягніка

«Кемлівай» правадніцы пагражае пяць гадоў турмы.

Цягнік «Кіраў-Кіславодск» прыбыў на саратаўскі вакзал пад дзевяць гадзін раніцы. Прыпынак тут доўгі - 43 хвіліны. Гэтым і скарысталася адна саратаўская радзіна, - з Кірава ў Валгаград ехаў іхні сваяк, і яны прыйшлі да цягніка, каб пабачыцца. Быў люты, за акном мінус 15, таму зайшлі ў купэ. Размаўлялі, глядзелі фатаграфіі... Як праляцеў час - не заўважылі, правадніца таксама не зрабіла заўвагі. Схамянуліся ўсё, калі цягнік крануўся. Кінуліся да выйсця. Цягнік ужо набіраў хуткасць, вакзал заставаўся ззаду. Галава сям’і хацеў было тузануць стоп-кран, але правадніца раптам заявіла, што спыняць вагоны дзеля іх ніхто не будзе і прапанавала... скочыць.

Людзі ці то разгубіліся, ці то падумалі, што хуткасць невысокая, але з вагона ўсе пяцёра выскачылі: муж з жонкай, іхняя дзесяцігадовая ўнучка і яшчэ дзве жанчыны - сёстры, піша «Комсомольская правда».

Дваім пашанцавала - дзяўчынка і адна з сясцёр не пацярпелі, астатніх павезлі ў шпіталь з рознымі траўмамі. Для 60-гадовай жанчыны яны сталіся смяротнымі. Медыкі дыягнаставалі ў яе апуханне мозгу і ўдар унутраных органаў, у тым ліку сэрца. Жанчына запала ў кому і праз два дні памерла ў лякарні.

Праўда, розгалас гэты выпадак атрымаў толькі праз два месяцы, калі саратаўская транспартная пракуратура распачала крымінальную справу паводле факту здарэння. Артыкул 263 крымінальнага кодэксу - «Невыкананне патрабаванняў гарантавання транспартнай бяспекі на аб'ектах транспартнай інфраструктуры і транспартных сродках асобай, адказнай за транспартную бяспеку, што пацягнула з неасцярожнасці смерць чалавека». Менавіта столькі часу спатрэбілася на экспэртызу, якая давяла: памерла жанчына менавіта праз траўмы, атрыманыя пры падзенні з цягніка.

- Першапачаткова следчыя правадніцу апытвалі як сведку трагедыі, цяпер ужо яе выклікаюць як падазраваную, але пакуль на допыт яна не з'явілася, бо жыве ў іншым рэгіёне, - распавяла памочніца саратаўскага транспартнага пракурора Кацярына Волкава.

Як стала вядома, правадніца ў гэты момант хварэе. Больш за тое, у прэс-службе Кіраўскай чыгункі нам заявілі, што пра гэтае надзвычайнае здарэнне нічога не ведаюць.

- Пры апытанні правадніца сказала, што спрабавала спыніць сям'ю, якая мерылася саскочыць. Аднак пацярпелыя сцвярджаюць адваротнае. З іхных слоў, жанчына дала ясна зразумець, што цягнік дзеля іх спыняць не ладзяцца, - паведаміў кіраўнік следчага аддзела СУ СК на транспарце Павел Алейнік.

Самае суровае пакаранне, якое пагражае жанчыне - да пяці гадоў турмы. Родныя загінулай Наталлі спадзяюцца на справядлівае пакаранне.

Дарэчы, падобны выпадак адбыўся некалькі гадоў таму ў Краснаярскім краі - тады правадніца цягніка Абакан-Краснаярск, забыўшыся абудзіць пасажыра на патрэбнай станцыі, потым прымусіла яго саскочыць з цягніка. Яна атрымала 10 месяцаў умоўна. Праўда, тады ніхто не пацярпеў.