Уладзімір Клічко: Расейцы не ўбачаць двубой з Ліпаі праз прапаганду

Фанаты бокса ў Расеі не ўбачаць бой 26 красавіка.

Чэмпіён свету паводле версій IBF, WBA, WBO і IBO ў суперцяжкай вазе Уладзімір Клічко 26 красавіка ў двубоі з аўстралійцам Алексам Ліпаі будзе чарговым разам бараніць свае тытулы. На сваёй старонцы ў Twitter баксёр паведаміў, што чэмпіёнскі матч наўрад убачаць гледачы з Расеі.

"Фанаты бокса ў Расеі не ўбачаць мой бой 26 красавіка на ТВ. Лепш, каб спорт яднаў, а не падзяляў нашы народы, як цяперашняя прапаганда", - напісаў украінец.

Ці звязана гэта з пастановай расейскіх улад - не ўдакладняецца.

Нагадаем, надоечы баксёр звярнуўся да прэзідэнта РФ Уладзіміра Пуціна з заклікам спыніць агрэсію супраць Украіны.

Бой адбудзецца 26 красавіка ў Обэрхаўзэне (Нямеччына).