АБСЕ знайшла прыкметы замежных кансультантаў на Данбасе

Місія АБСЕ знайшла прыкметы працы замежных кансультантаў ва ўсходніх абласцях Украіны.

Як паведамляе Радыё Свабода, пра гэта заявіў кіраўнік місіі Клаўс Цылікенс. Аднак ён удакладніў, што дакладных довадаў гэтага ў місіі АБСЕ пакуль няма.

Пры гэтым Цылікенс, які раней доўгі час працаваў у рэгіёне як консул Нямеччыны, адзначыў, што цяперашняя адсутнасць довадаў не азначае, што замежных вайскоўцаў на тэрыторыі Украіны няма.

«Можа, заўтра будуць такія довады, я гэтага не выключаю. Пакуль іх (довадаў) няма. Але прыкметы ёсць», - адзначыў ён.

Цылікенс таксама дадаў, што ў паведамленнях аб колькасці загінулых у сутыкненнях з удзелам сепаратыстаў ва Украіне звычайна завышаюць. У прыватнасці, у Марыупалі, дзе паведамлялася аб трох загінулых нападніках на ўкраінскую вайсковую частку, місія змагла пацвердзіць толькі аднаго загінулага.

З ягоных слоў, місія карыстаецца толькі адкрытай інфармацыяй, гэта значыць «глядзіць і піша пра тое, што бачыць на месцы». На базе гэтай інфармацыі можа быць створана не зусім поўная карціна, але Цылікенс мяркуе, што гэтая карціна аб'ектыўная.

Нагадаем, з 6 красавіка расейскія дыверсійныя групы і мясцовыя сепаратысты пачалі планамерныя захопы будынкаў адміністрацый ва ўсходніх абласцях Украіны, а таксама ўпраўленняў МУС і СБУ, якія прывабліваюць баевікоў зброевым арсеналам.

У адказ улады Украіны пастанавілі аб пачатку антытэрарыстычнай аперацыі ва ўсходніх рэгіёнах краіны. На Данбас перакінулі вайскоўцаў і тэхніку.