Мясніковіч прапануе будаваць Cadillac у Беларусі

Прэм'ер-міністр Беларусі правёў сустрэчу з прэзідэнтам і кіраўніком кампаніі General Motors па СНД Эндру Данстанам.

Пра гэта паведамляе прэс-служба ўрада.

Як адзначыў у ходзе сустрэчы прэм'ер-міністр, беларускі ўрад зацікаўлены ў супрацоўніцтве з General Motors.

"Мы падтрымліваем раней прынятае рашэнне ў рамках супрацоўніцтва з кампаніяй "Юнісан". Думаю, яно можа быць пашырана таксама за кошт працы і з іншымі беларускімі, а таксама расейскімі кампаніямі", - лічыць Мясніковіч. Ён адзначыў, што ў бягучым годзе ў Беларусі створаныя неабходныя прававыя ўмовы для гэтага супрацоўніцтва, прыняты цэлы шэраг нарматыўна-прававых актаў, у тым ліку ўказы прэзідэнта. З кіраўніцтвам Расейскай Федэрацыі ўрэгуляваныя пытанні, звязаныя з утылізацыйным зборам.

На думку прэм'ер-міністра, першай мадэллю аўтамабіляў, зборку якіх у рамках праекта з беларуска-брытанскім прадпрыемствам "Юнісан" пачне ў Беларусі General Motors, можа стаць Chevrolet або Opel.

Рамачнае пагадненне аб зборцы мадэляў аўтамабіляў General Motors на вытворчых магутнасцях СП ЗАТ "Юнісан" у Беларусі было падпісана ў чэрвені 2013 года. Сёння гэты праект суправаджае група высокага ўзроўню на чале з віцэ-прэм'ерам Пятром Пракаповічам.

Што тычыцца непасрэдна рэалізацыі праекта, то першым яго этапам павінна стаць буйнавузлавая зборка. Пры гэтым Міхаіл Мясніковіч адзначыў: "Нам трэба падумаць над паглыбленнем лакалізацыі". У стварэнні дадатковага дабаўленага кошту, па яго словах, будуць зацікаўленыя абодва бакі. "Зрабіць гэта можна было б за кошт стварэння магутнасцяў па зварцы і афарбоўцы кузаваў", - сказаў ён. Гэтыя падыходы ўжо абмяркоўваліся беларускім бокам, дасягнутае поўнае разуменне. Таму, лічыць Мясніковіч, цяпер можна было б разглядаць ужо і наступныя крокі свайго роду дарожнай карты па вытворчасці аўтамабіляў у Беларусі.

Закранаючы пытанні пашырэння супрацоўніцтва з General Motors, Міхаіл Мясніковіч прапанаваў кампаніі прыгледзецца да магчымасцяў беларускай прамысловасці, якая сёння вырабляе дастаткова канкурэнтаздольныя аўтакампаненты.

На паспяховае развіццё бізнесу ў Беларусі разлічвае і сама кампанія. "Для General Motors вельмі важна, каб мы пабудавалі добры бізнес і зрабілі якасныя аўтамабілі", - сказаў Эндру Данстан. Рэалізацыя гэтага праекта, адзначыў ён, дазволіць кампаніі ў тым ліку выгадаваць добры персанал.

"Цяпер галоўная задача - падрыхтаваць усё, каб праект развіваўся, - працягнуў прэзідэнт і кіраўнік General Motors. - Мы ўжо выбралі прадукт, з якога будзем пачынаць (гэта будзе адзін з прадуктаў, які мы прадаем у Расеі), - гэта будзе Chevrolet або Opel. Таксама мы сёння разглядаем Cadillac".

Кампанія General Motors і яе партнёры вырабляюць аўтамабілі ў 30 краінах. Кампанія з'яўляецца лідарам аўтамабільнага рынку, самага буйнога і хуткарослага ў свеце. General Motors належаць такія брэнды, як Chevrolet, Cadillac, Baojun, Buiсk, GMC, Holden, Isuzu, Jiefang, Opel, Vauxhall і Wuling. У Расеі кампанія прадстаўленая з 1992 года брэндамі Chevrolet, Opel і Cadillac.

СП ЗАТ "Юнісан" размешчаная ў вёсцы Абчак у 10 км ад Менска. Прадпрыемства было заснавана ў 1996 годзе як беларуска-брытанскае сумеснае прадпрыемства Ford Union, а ў 2000 годзе пераўтворана ў СП ЗАТ "Юнісан". На працягу больш 15 гадоў прадпрыемства ажыццяўляла зборку шэрагу аўтамабільных марак, уключаючы Ford, KIA, Samand.