СБУ: Дакументы аб расстрэлах на Майдане знішчаныя
4- 3.04.2014, 16:51
- 20,584
Па словах начальніка ўпраўлення ўнутранай бяспекі СБУ, засталася толькі дакументацыя па бухгалтэрыі, дакументаў па Майдане няма.
Усе дакументы па расстрэлах 18-20 лютага былі знішчаныя былым кіраўніцтвам перад уцёкамі. Пра гэта заявіў начальнік упраўлення ўнутранай бяспекі СБУ Мікалай Кушчаеў на пасяджэнні ВСК па расследаванні супрацьпраўных дзеянняў праваахоўных органаў і асобных службовых асоб падчас падзей, звязаных з масавымі акцыямі пратэсту, якія праходзілі з 21 лістапада 2013 года, паведамляе Укринформ.
"Мы прыйшлі ў СБУ, і не было ніводнага дакумента, ніводнага жорсткага дыска. Усе 100% дакументаў знішчаныя, засталася толькі дакументацыя па бухгалтэрыі. Адпаведна, цалкам знішчаная інфармацыя адносна абстрэлу на Майдане 18-20 лютага гэтага года", - адзначыў Кушчаеў.
Ён таксама дадаў, што па стане на сёння ўсё былое кіраўніцтва СБУ, а таксама кіраўніцтва спецпадраздзялення "Альфа" і шэрагу іншых падраздзяленняў знікла.
"Па некаторай інфармацыі былое кіраўніцтва з'яўляецца то ў Маскве, то ў Крыме", - паведаміў Кушчаеў.
У той жа час, сёння цяперашні кіраўнік СБУ Валянцін Налівайчанка заявіў, што былое кіраўніцтва спецслужбы перавезла ў Сімферопаль сакрэтную дакументацыю, аднак дакументы атрымалася вярнуць у сталіцу. Ён таксама пацвердзіў дачыненне адхіленага прэзідэнта Віктара Януковіча да арганізацыі масавых расстрэлаў людзей падчас акцый пратэстаў у цэнтры Кіева.