МЗС Украіны: Расея рыхтуе другі этап акупацыі

Абвастрэнне сітуацыі ў асобных гарадах Усходу і Поўдня Украіны інспіравана звонку і выклікана падрыўной дзейнасцю Масквы.

Пра гэта гаворыцца ў заяве Міністэрства замежных спраў Украіны, апублікаванай на сайце ведамства. Да ажыццяўлення правакацый прыцягнутыя групоўкі, якімі кіруюць расейскія спецслужбы.

"Агрэсіўныя дзеянні, якія ставяць пад пагрозу жыццё і бяспеку ўкраінскіх грамадзян, актывізацыя сепаратысцкіх сіл і ўдзел у супрацьпраўных дзеяннях грамадзян Расеі сведчаць пра намер ажыццявіць другі этап акупацыі Украіны. Дыверсійная праца суправаджаецца маштабнай прапагандысцкай кампаніяй, якая цынічна скажае факты, прымяняе шантаж і пагрозы, распаўсюджвае адкрытую хлусню і мае на мэце апраўдаць умяшанне ва ўнутраныя справы Украіны", - падкрэсліваюць у міністэрстве.

Эскалацыя сітуацыі павінна была прывесці да кровапраліцця і сілавога супрацьстаяння. Гэтую нагоду планавалася выкарыстоўваць для далейшай агрэсіі, перакананыя ў МЗС. Разам з тым, сёння сітуацыя стабілізаваная.

"Правапарадак забяспечваецца сіламі ўкраінскіх праваахоўных органаў, якія жорстка і ў рамках закона будуць дзейнічаць супраць любых антыдзяржаўных і антынародных замахаў. Развіццё падзей знаходзіцца пад кантролем. Украінскія грамадзяне не паддаліся на правакацыі. Наш народ не прымае і не прыме ідэй сепаратызму і фашызму, якія актыўна распаўсюджваюць правакатары з расейскіх спецслужбаў. Ідэя т.зв. "федэралізацыі" Украіны, якая навязваецца Масквой, належыць да гэтага ж чысла спецыяльных распрацовак. Гаворка ідзе не пра федэралізацыю, а пра "паралізацыю" нашай дзяржавы, яе эканомікі і магчымасцяў нашых грамадзян", - гаворыцца ў заяве.

У міністэрстве адзначаюць, што фундаментальнай пазіцыяй урада Украіны з'яўляецца абарона ўсіх дэмакратычных правоў і свабод чалавека, развіццё сапраўднага дыялогу нацыянальнай згоды ў краіне і прадастаўлення ўсім суайчыннікам вычарпальных і рэальных магчымасцяў мясцовага самакіравання, якія дазволяць кожнаму жыхару Украіны быць гаспадаром роднай дзяржавы.

"Расейскі шавінізм не цікавяць правы чалавека, уключна з рэальнымі патрэбамі самога расейскага народа, чыё складанае эканамічнае, сацыяльнае і дэмаграфічнае становішча выклікае справядлівы міжнародны неспакой і трывогу. Цяжкія ўнутраныя праблемы Расеі павінны ацверазіць агрэсара.

Украіна патрабуе ад Расейскай Федэрацыі неадкладна спыніць умяшальніцтва ва ўнутраныя справы Украіны і выканаць публічныя абавязацельствы аб дээскалацыі сітуацыі.

Украіна гатовая да міжнароднага ўрэгуляванні дыялогу ў тых фарматах, якія здольныя забяспечыць практычныя вынікі ў выразна акрэсленай часовай перспектыве", - адзначаецца ў заяве.

У МЗС падкрэслілі, што "пытанні, якія адносяцца да суверэннага права ўкраінскага народа ажыццяўляць сваю ўнутраную і знешнюю палітыку, не могуць быць прадметам перамоваў", і перасцераглі расейскі бок ад дакучлівых спробаў прыдумаць для Украіны сваю канстытуцыю.

"Гэтыя намеры не маюць нічога агульнага з інтарэсамі нашых грамадзян. Яны адлюстроўваюць план акупацыі і застою. Прынцыповымі элементамі ўрэгулявання павінны стаць спыненні агрэсіўных дзеянняў, рыторыкі і падрыўной дзейнасці Расейскай Федэрацыі супраць нашай дзяржавы, адмова Расеі ад заваявальных планаў, якія прадстаўляюць прамую пагрозу для ўсіх дзяржаў-суседзяў і міжнароднага міру і бяспекі, адвод падраздзяленняў узброеных сіл Расеі ад украінскіх межаў і з Аўтаномнай Рэспублікі Крым. Украіна вітае маштабную сусветную салідарнасць на абарону свайго суверэнітэту, тэрытарыяльнай цэласнасці і непарушнасці межаў. Нашымі сумеснымі сіламі павінна кіраваць упэўненасць і цвёрдая гатоўнасць вярнуць Расею ў цывілізаванае поле адносінаў, права і суіснавання дзяржаў", - адзначылі ў МЗС.