ЕЗ рыхтуе перамовы паміж Кіевам і Масквой з удзелам ЗША

Еўрапейскі Звяз актыўна ўдзельнічае ў працэсе падрыхтоўкі чатырохбаковай сустрэчы ЗША, Расеі, ЕЗ і Украіны.

Пра гэта паведаміла прадстаўніца кіраўніцы еўрапейскай дыпламатыі Кэтрын Эштан Мая Каціянчыч, піша «Інтэрфакс-Украіна».

«ЕЗ актыўна бярэ ўдзел у дыпламатычных намаганнях, спрабуючы дээскалаваць крызіс. Мы працуем над падрыхтоўкай такой сустрэчы», - сказала яна.

Каціянчыч зноў устрымалася ад ацэнкі таго, што адбываецца на паўднёвым усходзе Украіны, канстатаваўшы, што Брусэль «ацэньвае сітуацыю».

«Мы падтрымліваем тэрытарыяльную цэласнасць і непадзельнасць Украіны і заклікаем устрымацца ад любога віду далейшай дэстабілізацыі», - падкрэсліла прадстаўніца Еўракамісіі.

Украіна гатовая да любых кансультацый з Расеяй і пры ўдзеле міжнародных пасярэднікаў у тым ліку, паводле пытання ўрэгулявання сітуацыі ў краіне. Пра гэта паведаміў дырэктар дэпартамента інфармацыйнай палітыкі МЗС Украіны Яўген Перабыйніс.

Нагадаем, 8 красавіка дзяржсакратар ЗША Джон Кэры і кіраўнік МЗС РФ Сяргей Лаўроў абмеркавалі магчымасць правядзення бліжэйшым часам прамых перамоваў паміж ЗША, Расеяй, ЕЗ і Украінай у пытанні пошуку мірнага развязання ўкраінскага крызісу.

Лаўроў заявіў пра гатоўнасць да такіх перамоваў, адзначыўшы пры гэтым неабходнасць прыцягнення да ўдзелу ў іх «прадстаўнікоў Поўдня і Усходу Украіны».