МВФ: Расейская эканоміка прадаўжае падзенне
8- 8.04.2014, 19:36
- 26,850
Экспэрты таксама прагназуюць Расеі рост беспрацоўя.
Міжнародны валютны фонд знізіў прагноз росту ВУП Расеі на 2014 год з 1,9 да 1,3%. Пра гэта гаворыцца ў дакладзе МВФ аб перспектывах развіцця сусветнай эканомікі напярэдадні прызначанай на канец тыдня вясновай сустрэчы кіроўных органаў фонду і Сусветнага банка.
Прагноз росту расейскай эканомікі на 2015 год таксама зніжаны. Калі ў студзені экспэрты МВФ чакалі, што эканоміка РФ у наступным годзе вырасце на 2,5%, то цяпер прагноз на 2015 год складае толькі 2,3%.
Як адзначаецца ў даследаванні, "сярэднетэрміновыя перспектывы эканомікі РФ і многіх іншых краін СНД пагоршыліся, бо эканамічны рост, як чакаецца, будзе абцяжараны апошнімі падзеямі паміж Расеяй і Украінай і звязаных з гэтым рызык".
Як падкрэсліваецца ў дакуменце, "плынь інвестыцый ўжо аслабела", і спецыялісты звязваюць гэта з "палітычнай нявызначанасцю".
Разам з гэтым экспэрты МВФ прагназуюць паступовае запаволенне росту спажывецкіх коштаў у РФ. З іх ацэнак, у гэтым годзе ён складзе 5,8%, а ў 2015 годзе - 5,3%. Гэта значна ніжэй за леташні паказчык у 6,8%.
"Расейская манетарная палітыка пераходзіць да таргетавання інфляцыі, таму стрымліванне інфляцыйных чаканняў павінна стаць прыярытэтам. Акрамя таго, рост гнуткасці валютнага курсу будзе дапамагаць згладжваць эканамічныя шокі", гаворыцца ў дакладзе. Аднак у выпадку значнага паслаблення рубля манетарная палітыка можа быць крыху больш жорсткай, каб стрымаць рост інфляцыі, мяркуюць у МВФ.
Для прыцягнення інвестыцый Расеі патрэбныя структурныя рэформы, дыверсіфікацыя эканомікі. Прыярытэтамі з'яўляюцца ўмацаванне ўлады законаў і зніжэнне ўцягнутасці дзяржавы ў эканоміку, мяркуюць экспэрты фонду. Разам з тым, мяркуюць аўтары дакладу, у Расеі будзе расці беспрацоўе. Калі ў мінулым годзе яго ўзровень складаў 5,5%, то ў гэтым і наступным гадах ён можа дасягнуць 6,2%. Таксама экспэрты МВФ чакаюць "істотнага адтоку" капіталу з РФ праз падзеі вакол Украіны.
Фота: Shutterstock