Венгрыя гатовая забяспечыць рэверс газу ва Украіну
1- 9.04.2014, 12:16
- 5,037
Аператар газаправодаў Foldgazszallitas гатовы прапампоўваць да 6 млрд. кубаметраў газу для Украіны пры наяўнасці свабодных магутнасцяў і кантракту.
Пра гэта паведамляе РІА «Новости» са спасылкай на прадстаўніцу фірмы Эдзіну Лакатош.
«У FGSZ з сакавіка 2013 года ёсць усе тэхнічныя і прававыя перадумовы для перадачы прыроднага газу ва Украіну. Гэтая перадача заўсёды адбываецца праз асобны газаправод», - заявіла яна.
Лакатош патлумачыла, што прапускная здольнасць згаданага асобнага трубаправода складае 16,8 млн. кубаметраў у суткі (6,1 млрд. у год).
Для перасылкі газу пастаўшчык павінен зарэзерваваць прапускную здольнасць на венгерска-украінскай мяжы ў адпаведнасці з кантрактам на перасылку газу з украінскім партнёрам. У такім выпадку FGSZ «прадаставіць патрэбную прапускную здольнасць з улікам даступнай прапускной здольнасці, у адпаведнасці з дзеючымі прававымі нормамі».
Магчымасць для фізічнага рэверсу існуе і ў Польшчы, дзе для прапампоўвання газу на ўсход можа быць выкарыстаны газаправод, які ідзе праз Хермановіцэ. Яго прапускная здольнасць складае 4,8 млн. кубаметраў у суткі (1,8 млрд. у год). Некаторы час гэты газаправод выкарыстоўваўся для паставак газу ад нямецкай RWE. У 2014 годзе, як вынікае з інфармацыйнай сістэмы польскага газаправоднага аператара GAZ-SYSTEM , газаправод не выкарыстоўваўся.
У агульнай колькасці Венгрыя і Польшча здольныя забяспечыць для Украіны да траціны неабходнага аб'ёму газу. Таксама разглядаецца магчымасць рэверсу буйнога аб'ёму газу са Славакіі.
Як паведамлялася , з 1 красавіка Расея падняла цану на газ для Украіны да 480 даляраў за тысячу кубаметраў. Украінскі ўрад адмаўляецца купляць такі дарагі газ. У еўрапейскіх краін газ можна набыць на 100-120 даляраў танней.