Супрацоўнік «Вконтакте» распавёў, хто чытае перапіску карыстальнікаў

Міхаіл Пятроў - у мінулым галоўны інжынер самага наведвальнага партала Рунэту - паведаміў аб магчымай альтэрнатыве «Вконтакте».

Новая сацыяльная сетка, з ягоных слоў, гарантуе бяспеку і адсутнасць якога-небудзь кантролю з боку дзяржавы, піша sobesednik.ru.

На сваёй старонцы Міхаіл Пятроў заявіў аб даступнасці перапіскі не толькі супрацоўнікам ФСБ, але і мабільным аператарам. Сярод апошніх Міхаіл Пятроў вылучыў Мегафон, чыя якасць працы ў гэтым годзе прыкметна пагоршылася.

Ён папярэджвае пра ўскладненні ў працы сацсетак: «Існае кіраўніцтва арыентаванае на зніжэнне выдаткаў усялякім коштам, або іх восенню заменяць. Але стаўка на дзве рэчы - новыя сэрвера не спатрэбяцца, бо відэа і аўдыё стануць платнымі».

Дарэчы, варта адзначыць учорашні збой у працы «Вконтакте». У карыстальнікаў знікалі паведамленні, фатаграфіі, запісы на «сцяне», узнікалі цяжкасці з «лайкамі» і каментарамі. Некаторы час сайт Vk.com зусім перастаў адказваць на якія-небудзь запыты. Прычына, як запэўнівае прэс-сакратар сацыяльнай сеткі Георгій Лабушкін, - анамальная спякота: «Паводле папярэдніх звестак непрыемнасці пачаліся ў момант выхаду з ладу астуджальнага абсталявання сэрвераў аднаго з цэнтраў апрацоўкі звестак «Вконтакте» ў Ленінградскай вобласці. Пасля гэтага адбылося аварыйнае адключэнне часткі сэрвераў».

Пятроў абяцае карыстальнікам бяспечную перспектыву: быццам бы яго зводныя браты Павел і Мікалай Дуравы восенню запусцяць новую сацыяльную сетку. Пра яе з'яўленне былы супрацоўнік «Вконтакте» выказваецца эмацыйна і шматспадзеўна: «З падрабязнасцяў: няма адсочвання пункту ўваходу - айпі выдзеленых і статычных, няма спасылак на воблака карыстальніка і яго файлаў, немагчымасць прачытаць перапіску нават распрацоўнікам сэрвісу. І наогул - нашая новая сацсетка - гэта прататып будучай дзяржавы».

Міхаіл Пятроў не з'яўляецца ўдзельнікам праекта, але рэкламуе яго і не выключае далейшага супрацоўніцтва. Паводле слоў Пятрова, новая сацыяльная сетка стане рэвалюцыйнай: "Сэнс сеткі - сусветная рэвалюцыя супраць існага дыктату ўлады над народам».

Паводле слоў Міхаіла Пятрова, новая сацыяльная сетка будзе «грамадскай», г.зн. без акцый і магчымасці гандлю імі. Як прыклад - «Вікіпедыя».

Зрэшты, сам Павел Дураў у каментары Tjournal зняпраўдзіў інфармацыю аб магчымым запуску сеткі гэтай восенню ці нават яе распрацоўкі: «Міхаіл не мае дачынення да нашай з Мікалаем каманды. Што да новых праектаў, то мы не пачыналі актыўную працу над імі, бо на ёсць сур'ёзныя задачы ў рамках Telegram».

Пасля свайго сыходу з «Вконтакте», які адбыўся 21 красавіка 2014 года, Павел Дураў у каментары для блога TechCrunch заявіў аб сваіх планах пачаць распрацоўку новай мабільнай сацыяльнай сеткі. Цяпер яго галоўным праектам з'яўляецца Telegram - мэсэнджэр з дэвізам «Вярніце назад нашае права на прыватнасць».

25 красавіка 2014 года аб сваім сыходзе з «Вконтакте» заявіў Міхаіл Пятроў, які раней узначальваў дата-цэнтр «Іцвой», дзе знаходзілася відэа і фотакантэнт карыстальнікаў «Вконтакте».