Пяскоў растлумачыў слова «Новаросія» ў звароце Пуціна

З ягоных слоў, гэта расейская назва поўдня Украіны.

Ужыванне ў загалоўку звароту Уладзіміра Пуціна словы «Новаросіі» не азначае прызнанне гэтага ўтварэння, яно проста адказвае гістарычнай моўнай традыцыі. Пра гэта ў інтэрв'ю радыёстанцыі «Эхо Москвы» распавёў прэс-сакратар прэзідэнта РФ Дзмітрый Пяскоў.

Адказваючы на пытанне журналіста, ці варта разумець ужыванне тэрміна «Новаросія» як прызнанне гэтага «новаўтварэння», прэс-сакратар адказаў адмоўна.

«Не, гэта тэрыторыя - яна гістарычна так называецца. Гэта гістарычная назва гэтай тэрыторыі. Калі вы паглядзіце па гісторыі, на працягу некалькіх соцень гадоў яе называлі Новаросія. Таму гэта абсалютная, скажам так, расейская назва вось гэтай вось тэрыторыі», - сказаў Пяскоў.

На пытанне карэспандэнта, ці ёсць у гэтай назве палітычная падаплёка, прэс-сакратар адказаў: «Гэта тое, як у Расеі называюць і называлі гістарычна гэтыя тэрыторыі, гэтыя землі».

Прэзідэнт Расеі Уладзімір Пуцін звярнуўся да апалчэнцаў Данбаса ў ноч на 29 жніўня. У ім ён заклікаў адкрыць гуманітарны калідор для ўкраінскіх вайскоўцаў, якія апынуліся ў атачэнні, піша РБК.

«Я заклікаю сілы апалчэння адкрыць гуманітарны калідор для ўкраінскіх вайскоўцаў, якія апынуліся ў акружэнні, для таго каб пазбегнуць бессэнсоўных ахвяр, даць ім магчымасць бесперашкодна выйсці з раёна баявых дзеянняў, уз'яднацца са сваімі сем'ямі, вярнуць іх маці, жонкам і дзецям, тэрмінова аказаць медыцынскую дапамогу параненым у выніку ваеннай аперацыі», - заявіў Пуцін.

Слова «Новаросія» было ўжытае толькі ў загалоўку, у тэксце звароту яно адсутнічае.

Прэм'ер міністр самаабвешчанай Данецкай народнай рэспублікі Аляксандр Захарчанка адказаў на ініцыятыву Пуціна, але высунуў свае ўмовы.

«Мы гатовыя даць украінскім часткам, акружаным у гэтых катлах, гуманітарныя калідоры пры ўмове здачы цяжкага ўзбраення і боепрыпасаў, каб гэта ўзбраенне і боепрыпасы ў будучыні не маглі быць выкарыстаныя супраць нас», - растлумачыў ён.

Начны выступ Пуціна стаў яго другім прамым зваротам непасрэдна да Данбасу. Першы раз прэзідэнт звярнуўся да жыхароў усходу Украіны ў пачатку траўня з прапановай перанесці рэферэндумы аб незалежнасці Данецкай і Луганскай абласцей. Тады апалчэнцы не выканалі яго просьбу і 11 траўня рэферэндумы адбыліся.

Той факт, што ДНР выставіла ўмовы для гуманітарнага калідора, прапанаванага Пуціным, павінен прадэманстраваць, што Расея не ўплывае на апалчэнцаў, а яны дзейнічаюць самастойна, распавёў палітолаг Аляксей Арбатаў.

«Захарчанка выставіў Украіне ўмовы капітуляцыі, якія, натуральна, выкананыя не будуць. Таму, хутчэй за ўсё, проста адправіцца другі гуманітарны канвой, і пройдзе ён па тэрыторыі, кантраляванай апалчэнцамі, без усялякіх дазволаў і працэдур», - упэўнены ён.

Умова Захарчанкі непрымальная для Украіны, таму адным з варыянтаў развіцця падзей можа стаць здача зброі асобнымі часткамі вайскоўцаў, заявіў у інтэрв'ю палітолаг Аляксей Макаркін. На яго думку, зварот Пуціна разлічаны на ўнутраную расейскую аўдыторыю.

«Расейцам трэба растлумачыць, навошта Расея хоча ратаваць Украіну. Прапаганда называе ўкраінскіх вайскоўцаў карнікамі, а навошта ратаваць карнікаў? Пуцін тлумачыць публіцы, што Расея выратоўвае не карнікаў, а тых, хто дзейнічае не па сваёй волі, а выконвае загад», - падсумоўвае экспэрт.