Ульяна Захаранка патрабуе дапытаць Шэймана і Сівакова

Маці выкрадзенага генерала Юрыя Захаранкі патрабуе ад Следчага камітэта і Генеральнага пракурора канкрэтных дзеянняў.

Аб гэтым піша сайт «Беларускага дакументацыйнага цэнтра».

11 снежня 2015 Ульяна Захаранка адправіла старшыні Следчага камітэта Івану Наскевічу і Генеральнага пракурору Аляксандру Канюку чарговыя скаргі.

Каментуе сітуацыю кіраўнік «Беларускага дакументацыйнага цэнтра» Раіса Міхайлоўская.

- Папярэдняя скарга Ульяны Рыгораўны Захаранкі, адпраўленая ў кастрычніку былому Старшыні СК РБ Валянціну Шаеву ў дачыненні да незаконных дзеянняў (бяздзейнасці) следчага Вараўка - начальніка аддзела галоўнай управы працэсуальнага кантролю Цэнтральнага апарата Следчага камітэта Рэспублікі Беларусь у частцы вытворчасці ім папярэдняга расследавання ў крымінальнай справе, адказам Першага намесніка Старшыні СК РБ Волкава А. А. ад 2 лістапада 2015 г № з-4967 пакінутая без задавальнення, - заявіла яна. - Пры гэтым неабходна адзначыць, што канкрэтныя матывы адмовы і спасылкі на нормы крымінальна-працэсуальнага заканадаўства ў лісце адсутнічаюць.

Маці Юрыя Захаранкі мяркуе, што дзеянні следчага незаконныя, і неабгрунтавана зацягваюць папярэдняе расследаванне і прыцягненне вінаватых асоб да крымінальнай адказнасці. У той жа скарзе яна патрабавала аб'яднаць крымінальныя справы ўсіх зніклых палітыкаў і кваліфікаваць іх паводле артыкула 128 КК РБ (у рэдакцыі 1999) - злачынствы супраць чалавечнасці.

Адказ першага намесніка старшыні Следчага камітэта Волкава практычна нічым не адрозніваецца ад папярэдніх лістоў, якія Ульяна Рыгораўна атрымлівала на свае скаргі: «Падстаў для задавальнення скаргі не маецца. Тэрмін папярэдняга расследавання ў крымінальнай справе паводле факта знікнення Вашага сына абгрунтавана падоўжаны ў сувязі з неабходнасцю правядзення следчых і іншых працэсуальных дзеянняў у праверцы розных версій здарэння».

- Аналагічную скаргу на незаконныя дзеянні (бяздзейнасць) следчага Вараўка ў кастрычніку 2015 Ульяна Рыгораўна накіравала ў адрас Генеральнага пракурора Аляксандра Канюка для прыняцця да следчага мер пракурорскага рэагавання. Адказам начальніка ўправы Генеральнай пракуратуры Рэспублікі Беларусь Сеўрука ад 30 кастрычніка 2015 №1501-593-99 ёй адмоўлена ў разглядзе скаргі паводле сутнасці і паведамлена, што яе «зварот» накіраваны ў адпаведнасці з кампетэнцыяй для разгляду кіраўніцтву Следчага камітэта Рэспублікі Беларусь.

Указаны адказ абскарджаны Генеральнаму пракурору са спасылкай на Закон «Аб пракуратуры Рэспублікі Беларусь і артыкулы 138, 139 КПК, нормы якіх ускладаюць на Генеральную пракуратуру Рэспублікі Беларусь разгляд скаргі Ульяны Захаранкі ў сутнасці і прыняцце захадаў пракурорскага рэагавання ў парадку нагляду за выкананнем законаў пры правядзенні папярэдняга расследавання.

Практычна Ульяна Рыгораўна чарговым разам атрымала ад дзяржаўных органаў, абавязаных у сілу сваёй кампетэнцыі абараняць яе інтарэсы, нічым не абгрунтаваныя адпіскі. Не будзем уважаць кіруючыя органы Следчага камітэта і Генеральнай пракуратуры некампетэнтнымі ў сваёй справе. Калі яны даюць такія адказы, значыць, ім ёсць што хаваць ад маці зніклага палітыка і грамадскасці.

У адказ на вышэйзгаданыя лісты юрысты БДЦ падрыхтавалі для Ульяны Захаранкі скаргі ў адрас кіраўнікоў Генеральнай пракуратуры і Следчага камітэта, у якіх падрабязна выклалі неабходнасць правядзення канкрэтных следчых дзеянняў «у праверцы розных версій здарэння» з указаннем канкрэтных імёнаў грамадзян, якія валодаюць інфармацыяй у справе, а менавіта:

1. Дапытаць падазраваных: Віктара Шэймана, Юрыя Сівакова, Дзмітрыя Паўлічэнку, Мікалая Васільчанку аб вядомых ім фактах і падзеях, якія належаць да знікнення Юрыя Захаранкі.

2. Дапытаць былога начальніка Крымінальнай міліцыі Мікалая Лапаціка, былога Генеральнага пракурора Алега Бажэлкі, былога старшыні КДБ Валерыя Мацкевіча, намесніка Генеральнага пракурора Міхаіла Снегіра, якія валодаюць звесткамі, што паслужылі падставай да затрымання і допытаў Дзмітрыя Паўлічэнкі.

3. Дапытаць афіцэраў і вайскоўцаў Мекіянца, Балыніна, Будзько, Коклін, Мурашка і іншых супрацоўнікаў, якія, магчыма, бралі ўдзел у выкраданні Юрыя Захаранкі, а таксама праверыць на дачыненне да выкрадання Юрыя Захаранкі Валерыя Ігнатовіча, Аляксея Гуза, Максіма Маліка і Сяргея Савушкіна.

У скаргах утрымліваюцца таксама патрабаванні аб завяршэнні папярэдняга расследавання ва ўстаноўленыя законам тэрміны і аб накіраванні крымінальнай справы ў суд.